هتريح نفسك من البنزين.. أرخص 5 عربيات كهرباء في مصر.. بتبدأ من 585 ألف
بعد ما البنزين والسولار ولعوا من تاني، والناس كلها بقت بتفكّر مرتين قبل ما تفوّل عربيتها، كتير بقى بيدور على عربية كهربا ترحمه من الزيادات اللي بتحصل كل شوية.
وعشان كده هنقولك دلوقتي على أرخص 5 عربيات كهربا موجودة في مصر.
الاولى هي دونج فينج BOX العربية دي تعتبر من أكتر العربيات الكهربائية العملية، وسعرها بيبدأ من 770 ألف جنيه وبيوصل لـ 870 ألف حسب الفئة، وبتقدر تمشي لحد 430 كم بالشحنة الواحدة.
وعندك كمان دونج فينج 007 العربية شكلها مميز وسعرها من مليون و350 لـ مليون و450 ألف جنيه، وبتقطع لحد 620 كم بالشحنة الواحدة، يعني مش هتقلق من المسافات الطويلة.
أما التالتة فهي mg ودي تعتبر من أرخص العربيات الكهربا الرسمية في مصر حاليًا، وسعرها بيبدأ من مليون و200 ألف جنيه، وبتقدر تمشي من 350 لـ450 كم على حسب الفئة، يعني أوفر وأكتر عربية عملية.
وفيه كمان ستروين Ami، ودي عربية صغيرة جدًا ومناسبة للمشاوير القصيرة جوه المدينة، وسعرها 585 ألف جنيه، وبتقدر تمشي 75 كم بالشحنة، وبتتشحن في حوالي 4 ساعات بس.
أما فيات Topolino أو “الفارة الصغيرة” زي ما بيسموها، فسعرها 650 ألف جنيه، وبتقطع 75 كم في الشحنة، وبتتشحن كمان في 4 ساعات، يعني مناسبة جدًا للشغل اليومي داخل المدينة.
