أغلى نبات في مصر.. الكيلو بـ2000 جنيه.. ليه المصريين بيقولوا عليه أكل الملوك!
فكل فترة نسمع عن حاجة غريبة بتظهر في الصحراء المصرية، بس المرة دي الحكاية مختلفة!
نبات شكله شبه البطاطس، بس سعره يخليك تعيد النظر مرتين قبل ما تشتريه! الكيلو منه بـ2000 جنيه، وبيسموه "أكل الملوك".
الترفاس أو الكمأ.. واحد من أغرب وأغلى النباتات اللي بتطلع في مصر، وبيتباع في الخليج بأسعار فلكية.. طب إيه سر النبات ده؟ وليه بقى أغلى من اللحمة نفسها؟
الترفاس أو الكمأ هو نبات نادر جدا بيظهر في مناطق معينة من مصر زي مطروح، السلوم، وسيوة، وبيطلع لوحده كده من غير ما حد يزرعه!
بمجرد ما تنزل أول مطرة في الصحرا، تبدأ الأرض “تفرخ” الترفاس.. ولا بيتزرع ببذور، ولا شتلات، ولا حتى سماد .. كله طبيعي 100٪.
بس الصعب مش في نموه، الصعب في إنك تلاقيه!
المزارعين بيضطروا يحفروا الأرض بأيديهم ويدوروا عليه تحت الرمل، انتوا متخيلين! وده بيخلي عملية الحصاد مرهقة جدًا، ومش أي حد يعرف يعملها. وده أول سبب يخلي سعره العالي منطقي.
الترفاس كمان ليه أنواع كتير، فيه الترفاس الأبيض وسعر الكيلو منه حوالي 1000 جنيه، وفيه الترفاس الأسود وده الأغلى، وممكن يوصل سعر الكيلو منه لـ 2000 جنيه أو أكتر حسب الموسم وجودة المحصول.
واللي أغرب من كده إن سعره بيتغير على حسب المطر! يعني لو السنة جافة ومفيش مطر كتير، النبات ده بيقل جدا، وسعره بيولع.
تجار في مطروح قالوا إن الترفاس كان زمان بيتباع بـ 400 جنيه، بس دلوقتي الأسعار تضاعفت أضعاف كتير، وده لأنه بيظهر في أماكن قليلة جدًا وموسمه قصير.
بس خليني اقولك ان الترفاس مش بس غالي في مصر، ده كمان كنز في الخليج العربي.. الخليجيين بيعتبروه “أكل الملوك”، وبيستخدموه في أكلات فخمة وغالية جدًا، وسعر الكيلو هناك ممكن يوصل لـ 300 ريال سعودي، وفي التصدير بيوصل أحيانًا لـ 100 دولار (يعني حوالي 5000 جنيه مصري!).
وعلى فكرة، قصة الترفاس في مصر بدأت في التسعينات لما قوافل السفاري من الخليج لاحظت إن نفس النبات اللي عندهم بيطلع كمان في صحراء مطروح. ومن وقتها بدأ الأهالي يجمعوه ويبيعوه، وبقى مصدر رزق مهم لعدد كبير من سكان البادية هناك.
أما عن فوائده الصحية، فحدث ولا حرج! الترفاس غني بالبروتين والمعادن ومفيد جدًا للمناعة والبشرة والعينين .. وبيستخدموه كمان في وصفات علاجية طبيعية من زمان جدا.
