الـ200 جنيه بطل سوق الصرافة في مصر.. إيه الحكاية؟
عمرك فكرت ليه بقى معظم الفلوس اللي في جيبك من فئة الـ200 جنيه؟.. ليه الـ50 والـ100 بقوا زي فكة في عيون الناس؟
خليني أقولك على حكاية الفلوس في مصر، واللي البنك المركزي بنفسه كشف عنها.. طبقًا لأحدث تقرير من البنك المركزي المصري، فئة الـ200 جنيه بقت بتمثل حوالي 66.4% من إجمالي النقد اللي بيتداول في السوق!
يعني كل 10000 جنيه مع الناس، فيهم أكتر من 6600 جنيه من الـ200!
في نفس الوقت... الـ100 جنيه نزلت لـ28.3%، والـ50 جنيه؟ نزلت لـ3% بس!"
طب ليه؟.. ببساطة، لأن التضخم خلا الـ200 جنيه.. تاخد نفس القيمة الشرائية اللي كانت زمان في الـ20 أو الـ50 جنيه.
زمان كنا نشتري شنطة خضار بـ10 جنيه، دلوقتي نفس الشنطة بـ200!"
الناس مش بتختار تستخدم فئة معينة، السوق هو اللي بيفرض ده، واللي مالوش قيمة... بيخرج أوتوماتيك.. زي ما حصل زمان مع الشلن والربع جنيه.
مفيش حد لغى المليم.. بس هو اختفى من نفسه، لأن السوق مش محتاجه!
والأغرب؟ رغم إن النقد المتداول زاد، إلا إن البنك المركزي قلل طباعة الفلوس، يعني القيمة موجودة، بس مطبوعة في ورق أكبر.
كل جنيه في جيبك وراه قصة، بس الـ200 جنيه؟ بقت هي بطل سوق الصرافة في مصر.
