بتنافس السعودية والإمارات.. استثمارات قطرية على البحر الأحمر في مصر: بقيمة 7.5 مليار دولار
قطر داخلة مصر باستثمارات ضخمة، وناوية تنافس السعودية والإمارات بمشروع عملاق على البحر الأحمر باستثمارات توصل لأكثر من 7.5 مليار دولار.. يا ترى ناوين يعملوا إيه؟.. وإيه المشروع ده؟
لما الإمارات نزلت بقوة في البحر الأحمر وعملت صفقة بـ١٨ مليار دولار وقتها الكل قال إن كده الخريطة الاستثمارية اتحسمت خلاص بين إعمار الإماراتية وسيتي ستارز السعودية، واللي واخدين ١٠ مليون متر مربع.. يعني مشروع ضخم حقيقي وكان واضح إن البحر الأحمر داخل على نقلة تانية.
قطر دلوقتي دخلت على الخط وبمشروع أضخم على مساحة ٢٩ مليون متر مربع أيوة رقم صحيح تلات أضعاف تقريبًا والمشروع تابع لشركة الديار القطرية اللي هي بالمناسبة ذراع جهاز قطر للاستثمار يعني بنك ضخم من الفلوس ماشية على الأرض.
واللي يخليك تركز أكتر إن الأرض دي أصلا كانت مخصصة للديار من ٢٠٠٦ بين مكادي وسوما باي بس ما اتحركش فيها حاجة ودلوقتي راجعين يعيدوا تشغيلها.
واللي قال الكلام ده مش مصادر ولا تسريبات ده السفير القطري بنفسه في مؤتمر رسمي مع الحكومة وقالها صريحة إن التفاوض شغال والمشروع هينطلق قريب.
وده مش المشروع الوحيد على فكرة قطر شغالة كمان على مشروع تاني في الساحل الشمالي في علم الروم على مساحة ٦٠ ألف فدان بقيمة استثمارية بتقرب من ٣٥ لـ40 مليار دولار يعني بنتكلم في مدينة سياحية كاملة متكاملة لسه التفاصيل هتُعلن بس اللي معروف إن المشروع ده على غرار رأس الحكمة اللي كانت محور كلام الكل قبل كده.
ولسه فيه مشروع تالت في القاهرة الجديدة اسمه سيتي جيت على ٨٥ مليون متر مربع ده غير إن إجمالي الأراضي اللي بتمتلكها شركة الديار القطرية جوه مصر دلوقتي وصلت لـ٤٠ مليون متر وده رقم قليل جدًا اللي يعرفه أو يستوعبه من كتر ما هو كبير.
كل ده بيحصل ضمن باكدج استثمارية أعلنوا عنها بقيمة 7.5 مليار دولار بين مصر وقطر وبدأ تفعيلها فعليًا وده غير الوفد اللي وصل من قطر دلوقتي عشان يقابل مسؤولين كبار ويتكلموا عن تنظيم السوق العقارية ونقل التجربة القطرية لمصر.
يعني إحنا مش بس بنتكلم عن استثمار ده كمان في شغل مؤسسي وشراكة أعمق من مجرد ضخ فلوس بس ركز معايا في التوقيت لأن ده هو المفتاح قطر نازلة بعد الإمارات والسعودية وده معناه إن في منافسة وكل واحد عايز يحط رجله قبل التاني على المربعات اللي لسه فاضية في الخريطة السياحية الجديدة بتاعة مصر.
خريطة بتترسم من جديد على البحر الأحمر في الساحل الشمالي في القاهرة وكلها أرقام بالمليارات وأراضي بالملايين.
