اختراع مصري هز شوارع امريكا.. شاب مصري ابهر العالم بنموذج ذكاء اصطناعي بينافس شات جي بي تي!
ابتكار مصري هز شوارع أمريكا واليابان.. طالب مصري عمل أول نموذج ذكاء اصطناعي عربي مصري بيتفوق على شات جي بي تي.
نافس اكبر مهندسين كوريا واليابان وأثبت أن المصري يقدر يعمل كل حاجة رغم صغر سنه .. يا ترى مين الولد ده وعمل ايه تعالوا نعرف ايه الحكاية.
في وقت ناس لسه بتسأل يعني إيه ذكاء اصطناعي كان في ولد في تانية ثانوي من المنيا قرر إنه ميستناش حد يشرح له قرر يبني بنفسه حاجة تشبه شات جي بي تي بس على طريقته بطابعه المصري بلغته العامية.
وفعلاً عملها يوسف رمضان ابن سمالوط قدر يعمل نموذج اسمه سبيدي نموذج ذكاء اصطناعي مش بيقلد ولا بيترجم لا ده بيبتكر من الصفر وبيتكلم زي ما إحنا بنتكلم... بيفهمك من أول كلمة ويساعدك من أول سؤال وبيخدم في مجالات كتير .. الطب.. القانون.. التعليم وكل ده مش من معلومات عشوائية لأ من مصادر موثوقة كل كلمة بيقولها وراها مرجع وراها علم مش مجرد رد والسلام زي نماذج تانية معروفة عالميا.
يوسف مؤمن إن الذكاء الاصطناعي مش رفاهية دي معركة جاية والعالم كله بيجهز لها ومن دلوقتي لازم يكون لينا مكان جوه السباق ده لازم نبني بأيدينا ونفكر بعقولنا مش بس نستهلك أفكار غيرنا وعلشان كده ماوقفش عند النموذج عمل فريق كامل معاه تحت شعار من هنا نبدأ نطور بلدنا مش مجرد جملة حلوة ده مشروع حقيقي هدفه يخلي كل مخترع صغير يلاقي اللي يسمعه ويدعمه ويمشي معاه الطريق لأنه شايف إن العقول دي كنز لازم مصر تحافظ عليه وتهتم بيه.
وفعلاً النموذج بتاعه خد براءة اختراع بس يوسف مش واقف عند كده .. ونفسه يشوف دعم أكبر دعم من مؤسسات بحجم بنك المعرفة والمركز القومي للبحوث علشان يكمل المشوار ويوصل بسبيدي للعالمية لأن الحلم كبير ومش أقل من كده الولد اللي كان ممكن يقعد في بيته ويتفرج على اللى بيحصل قرر إنه يبقى جزء من اللي بيحصل قرر ينافس مهندسين من اليابان ويثبت إن العقل المصري لما يركز يقدر ويوصل ويمكن كمان يتفوق. بس يا ترى بقى واحد زي يوسف هنشوفه فين لما يكبر.
