في المكسب ولا الخسارة.. شوف مكاسب وخسائر محلات الصاغة في حالات ارتفاع وانخفاض الأسعار
اوقات كتير يكون أسعار الذهب في زيادة وأحيانا تانية يكون في انخفاض.. ياتري هل محلات الصاغة بتكسب أكثر في وقت الارتفاعات ولا الانخفاض.. وآية الوقت المثالي لشراء الذهب.
سنة 2025 مختلفة تماما عن كل السنين اللي فاتت، خصوصا انها سنة مليان تحديات وتغيرات جيوسياسية كبيرة محصلتش من سنين طويلة، والتغيرات دي لها تأثير علي كل الأسعار، واحدة من الأسعار اللي حصل فيها تغيرات شديدة هيا أسعار الذهب واللي وصلت الزيادات اللي حصلت فيها لـ43% ودي ارقام غير مسبوقة، خصوصا انها حصلت في وقت أسعار الصرف في مصر مستقرة وكمان الجنية المصري حقق مكاسب كبيرة قدام الدولار.
التغيرات الكبيرة اللي حصلت في أسعار الذهب كان جزء منها هو الإقبال الكبير من الناس علي محلات الصاغة لشراء الذهب، وفي علي مدار اول 9 شهور من 2025 كان كبير جدا، وده لأسباب كتيرة أولهما الانخفاضات المتتالية اللي أقرها البنك المركزي في أسعار الفائدة، ده غير اتجاه البنك الفيدرالي الأمريكي لخفض أسعار الفائدة واللي كانت بدايته القرار اللي صدر من كام يوم بخفض أسعار الفائدة بنسبة 25 نقطة أساس، ولسه في توقعات جاية بتأكد أن هيكون في خفضين لأسعار الفائدة علي الاقل .
طيب هل محلات الصاغة بتكسب أكثر في حالات زيادة أسعار الذهب ولا في حالات الانخفاض ؟.
علشان نفهم القصة دي لازم نعرف أنه في أكثر من بند بتحدد عليهم مكاسب محلات الصاغة أولها سعر جرام الذهب الخام، خصوصا أن المحلات بتشتري الذهب من السوق العالمي أو المحلي واللي بيكون في صورة خام، والسعر ده بيتغير كل شوية، وكل ما السعر بيرتفع، المحل بيرفع السعر في البيع.
تاني حاجة بتحدد علي أساسها مكاسب محلات الصاغة هيا لمصنعية ودي معناها تكلفة التصنيع والتصميم وأجرة الصانع والمحل، المصنعية غالبا بتكون ثابتة أو بنسبة تغير بسيطة جدا من مكان للتاني، لما التصميم يكون معقد أو فيه تفاصيل، المصنعية بتكون أكبر.
تالث حاجة بتحدد أسعار الذهب هيا الدمغة والضرائب، وفي بعض الدول أو المحلات بتفرض دمغة أو ضريبة قيمة مضافة، ودي بتكون على سعر الذهب أو على الوزن الإجمالي، واخر حاجة هيا تكلفة الهالك خصوصا انت في وقت تشكيل الذهب في أجزاء بسيطة بيضيع، وده اسمه الهالك، المحل بيحسب تقدير الهالك ضمن المصنعية عشان يغطي الخسارة دي، وبناء ادعلي كل ده المحل بيحدد المكسب بتاعه في كل جرام كام، ويحط عليها نسب الربح اللي هو عايزها.
لازم نكون عارفين ان اسعار الذهب لما بتزيد في السوق محلات الصاغة بتكسب أكثر خصوصا أن بيكون عندها ذهب خام، والربح بيكون أعلى لو المصنعية ثابتة، لكن لما السعر بينزل، المشتري بيخسر مش بس علشان السعر نزل لا ده كمان المشتري خسر سعر المصنعية اللي دفعه.
