هبوط الدولار.. صندوق النقد يعلق على رفع أسعار البنزين.. وتوجيهات رئاسية بخصوص شركات القطاع العام
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، هبوط مفاجيء للدولار، وصندوق النقد يعلق 7 على رفع اسعار البنزين، وتوجيهات رئاسية بخصوص شركات القطاع العام.
ونبدأ من سوق الصرف.. الدولار نزل قدام الجنيه المصري في كذا بنك من البنوك اللي شغالة في القطاع المصرفي النهارده، بقيمة ما بين 10 لـ 15 قرش، مقارنةً بأسعاره أول اليوم، وده حسب بيانات أسعار الصرف اللي البنوك نشرتها على مواقعها الرسمية.
سعر الدولار في الأهلي المصري، المصرف العربي الدولي، نكست، بنك الشركة المصرفية، أبو ظبي الأول، والبركة وصل لـ 47.95 للشراء و48.05 للبيع.
أما في بنوك مصر، التجاري الدولي، العربي الأفريقي، أبوظبي التجاري، البركة، والتعمير والإسكان فسجل 47.97 للشراء و48.07 للبيع، وفي بنك فيصل الإسلامي وصل 47.96 للشراء و48.06 للبيع.
وكمان الدولار سجل 47.96 للشراء في QNB والبنك العقاري المصري و48.06 للبيع.
ونروح لـ أليكس سيجورا-أوبيرجو، الممثل المقيم الأول لصندوق النقد الدولي في مصر، اللي قال إن الصندوق مش بيطلب رفع أسعار البنزين في مصر، وإن الحكومة هي اللي شايفة إن لازم الأسعار تزيد تدريجي عشان التكلفة اللي الاقتصاد بيتحملها من الدعم.
سيجورا قال الكلام ده في ندوة نظمها المركز المصري للدراسات الاقتصادية، وأكد إن التوفير اللي بييجي من تقليل دعم البنزين هيتوجه للفئات الأكثر احتياجًا وبرنامج تكافل وكرامة، واللي وصفه إنه بيحقق نتائج كويسة.
وأشار كمان إن الحكومة ملتزمة تزود مخصصات برنامج تكافل وكرامة، وإن الصندوق عايز البرنامج يكمل ويتوسع عشان يقوي شبكة الحماية الاجتماعية.
وبالنسبة للإصلاح الاقتصادي، ممثل الصندوق قال إن لسه التقدم في ملف الطروحات الحكومية وتنفيذ وثيقة ملكية الدولة مش كفاية، وإنهم منتظرين يشوفوا خطوات أكتر في الاتجاه ده.
وشدد إن الصندوق مش بيوصي بزيادات سعرية، لكنه بيركز على السيطرة على الأسعار وتقليل التضخم، وأكد إن البنك المركزي بيدير السياسة النقدية بشكل ممتاز وماشي في اتجاه واضح لخفض التضخم.
ونروح للدكتور مصطفى مدبولي، رئيس الوزراء، اللي عمل اجتماع النهارده لمتابعة إعادة هيكلة وتطوير شركات الغزل والنسيج، وحضر معاه المهندس محمد شيمي، وزير قطاع الأعمال، ومسؤولين من الوزارة.
مدبولي أكد إن تطوير مصانع الغزل والنسيج مهم جدًا عشان الدولة مهتمة بالقطاع ده، وقال إن فيه توجه من الدولة للشراكة مع القطاع الخاص عشان يبقى في إدارة محترفة للمصانع اللي اتصرف عليها مليارات.
وأوضح كمان إن ده جاي بتوجيهات من الرئيس عبد الفتاح السيسي بضرورة الاستمرار في تطوير الشركات التابعة لقطاع الأعمال العام وتحسين أدائها وطريقة إدارتها، وتعظيم الاستفادة من الأصول، خصوصًا من خلال الشراكة مع القطاع الخاص ومواكبة التطور التكنولوجي، ولازم يبقى فيه أهداف واضحة لكل شركة.
ونختم من سوق الدهب، اللي عايش حالة ترقب وحذر مع استمرار ارتفاع الأسعار عالميًا وتغيرات السياسة النقدية الأمريكية.
محليا، الدهب بيواصل تسجيل مستويات جديدة، وسعر جرام عيار 21 – الأكتر انتشارًا بين المصريين سواء للادخار أو للجواز – وصل النهارده لـ 5130 جنيه.
أسعار الدهب النهارده في مصر:
عيار 24: حوالي 5862.75 جنيه للجرام.
عيار 21: حوالي 5130 جنيه للجرام.
عيار 18: حوالي 4397.25 جنيه للجرام.
عيار 14: حوالي 3420 جنيه للجرام.
الجنيه الدهب (8 جرام عيار 21): حوالي 41040 جنيه
والأسعار دي بتعكس وضع السوق المحلي واللي مرتبط بشكل مباشر بسعر الدولار وسعر الأوقية عالميًا.
