تعليمات مشددة من المركزي.. مصر تصدر أدوية لأمريكا.. ومجموعة سعودية تستثمر في مصر
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، تعليمات مشددة من المركزي، ومصر تصدر أدوية لأمريكا، ومجموعة سعودية تستثمر في مصر.
نبدأ من البنك المركزي المصري.. واللي ألزم البنوك إنها تاخد خطاب من الهيئة العامة للرقابة المالية قبل ما توافق على أي تمويل أو تجديد تسهيلات ائتمانية أو حتى عمليات توريق لأي شركة خاضعة للهيئة.
الخطاب ده بيأكد إن الشركة ماشية صح وملتزمة بالقواعد والمعايير اللي الهيئة محدداها، ومافيش عليها مخالفات أو جزاءات شغّالة.
وده بيرجع للكتاب الدوري اللي اتنشر في أكتوبر 2019 بخصوص ضوابط تمويل شركات التمويل متناهي الصغر، وكمان الخطاب الدوري في فبراير 2024 اللي بيتكلم عن ضوابط تمويل شركات التأجير التمويلي. اللي اتنين أكدوا على ضرورة إن البنوك ما تمولش غير الشركات الملتزمة تمامًا بالقواعد اللي الرقابة المالية حطاها.
نروح للأرقام.. إجمالي النقد المصدر والمتداول وصل 1.451 تريليون جنيه في آخر مايو 2025، مقابل 1.410 تريليون جنيه في أبريل اللي قبله. أما فئة الـ200 جنيه لوحدها وصلت 948.5 مليار جنيه مقابل 922.5 مليار في أبريل.
نسبة النقد المصدر للناتج المحلي الإجمالي سجلت حوالي 8.4% في مايو، بعد ما كانت 8.16% في أبريل. وكمان النقد المتداول برا خزائن البنك المركزي ارتفع لـ1.452 تريليون جنيه في مايو، مقابل 1.411 تريليون في أبريل.
ونروح لخبر مهم في صناعة الدوا.. شركة "جيبتو فارما" مدينة الدواء المصرية، وقعت اتفاق مع شركة "دوا فارماسيوتيكالز" الأمريكية، الهدف منه تعزيز صناعة الأدوية في مصر والحصول على اعتماد هيئة الغذاء والدواء الأمريكية.
صناعة الأدوية في مصر مجال استراتيجي جدًا للتجارة والاستثمار، وبتحظى باهتمام مباشر من الرئيس عبد الفتاح السيسي.
رئيس الوزراء الدكتور مصطفى مدبولي أكد إن الرئيس بيدعم استراتيجية توطين الصناعات الحيوية وعلى رأسها الأدوية، وبيسعى لفتح أسواق تصدير جديدة، ومنها السوق الأمريكي.
مدبولي شدد كمان على أهمية الشراكة مع "دوا" الأمريكية في إدخال معدات وخبرات متطورة لمصر، ودعم جهود الحكومة في الحصول على اعتماد الـ FDA، وده اللي هيرفع مكانة صناعة الأدوية المصرية إقليميًا ودوليًا ويأكد إننا مستعدين للمنافسة بجودة عالمية.
ومن الأدوية نروح للصناعة.. الفريق كامل الوزير، نائب رئيس مجلس الوزراء للتنمية الصناعية ووزير الصناعة والنقل، عقد اجتماع مع مجموعة "كنان" القابضة السعودية برئاسة مهيلب المهيلب.الاجتماع ناقش خطة المجموعة لإنشاء مجمع صناعي باستثمارات حوالي 2 مليار جنيه.
المجمع هيضم مصانع متكاملة:
* مصنع لإنتاج وصلات وحنفيات ومحابس المياه النحاسية.
* مصنع لتصنيع الإكسسوارات وأيادي الزنك والاستانلس.
* مصنع متخصص في إنتاج خلاطات المياه النحاسية بأشكال وألوان مختلفة.
المشروع ده هيقوي قاعدة الصناعات المعدنية في مصر، وهيوفّر أكتر من 1000 فرصة عمل مباشرة.
ونختم بخدمة جديدة ومختلفة.. أورنچ مصر أعلنت لأول مرة في السوق المصري عن خدمة رقمية لشراء وبيع الذهب أونلاين، بالتعاون مع منصة "منجم".
الخدمة متاحة عبر تطبيق My Orange، والدفع بيتم من خلال محفظة أورنچ كاش، ودي أول خدمة من نوعها لشركات المحمول في مصر.
الجميل كمان إن أي عميل يقدر يشتري ذهب بداية من 5 جنيه بس! ومعاها عرض كاش باك يوصل لـ100 جنيه على أول عملية شراء كل شهر بقيمة 500 جنيه أو أكتر. الفلوس دي ممكن تستخدمها في دفع فواتير الموبايل أو شحن الرصيد أو تجديد الباقات.
