25 مليار دولار صادرات من مصانع القنطرة غرب.. مفاجأة تكشفها الحكومة لأول مرة
مصر تنتظر 25 مليار دولار من صادرات القنطرة غرب.. بس هل ده معناه إننا قربنا نوصل لهدف 140 مليار دولار صادرات في 2030؟، وإزاي المنطقة الصناعية دي هتأثر على حياة الشباب اللي بيدوروا على شغل؟، وهل البنية التحتية اللي اتعملت في القنطرة غرب ممكن تتكرر في باقي المحافظات؟
تخيل معايا لما تسمع رقم زي 25 مليار دولار صادرات من مكان واحد بس، تحس كأنك قدام حلم كبير، بس الحقيقة إن الحلم ده الحكومة أعلنت أنه ممكن يتحقق من مصانع القنطرة غرب، بعد ما تخلص على الآخر.
الدكتور مصطفى مدبولي، رئيس مجلس الوزراء، قال إن المنطقة الصناعية بالقنطرة غرب مساحتها 20 مليون متر مربع، يعني حاجة قد مدينة صغيرة، ولسه اللي اتعمل فيها دلوقتي مجرد المرحلة الأولى بس.
اللي حصل أن الدولة صرفت حوالي 15 مليار جنيه علشان تجهز البنية التحتية، من كهرباء وميه وغاز وصرف صحي وطرق، واتصالات، يعني من الآخر الأرض كانت برك ومستنقعات، وبقت دلوقتي جاهزة تبني عليها مصانع ومشاريع.
وبمجرد ما خلصوا المرحلة الأولى، المنطقة قدرت تجذب 40 مشروع استثماري جديد، منهم مصنعين اتفتحوا رسميًا، والمشاريع دي بس فيها استثمار أجنبي حوالي مليار دولار، وكمان هتوفر 50 ألف فرصة عمل للشباب المصري.
الأهم مش بس فرص العمل، لكن التصدير لو كل مصنع من دول هيصدر ما بين 50 لـ100 مليون دولار في السنة، يبقى إحنا بنتكلم على صادرات بين 3 لـ4 مليار دولار سنويًا من المرحلة الأولى بس!
ولما المشروع يكتمل وفيه 50 مصنع شغال، ده معناه إننا ممكن نوصل لصادرات حوالي 25 مليار دولار من المنطقة دي وحدها، وكمان مع نص مليون فرصة عمل.
مدبولي وضح إن ده كله داخل في رؤية مصر 2030، اللي بتستهدف نوصل بإجمالي الصادرات لـ140 مليار دولار، يعني القنطرة غرب مش مجرد منطقة صناعية، دي هتكون واحدة من العربيات اللي بتسحب قاطرة الاقتصاد المصري لقدام.
واللي يلفت النظر كمان، أن الدولة مش بس بنت مصانع، لكن جهزت كل حاجة، زي محطة غازومحطة كهرباء وشبكة صرف ومحطة مياه وطرق جديدة، يعني وفرت الأرضية اللي أي مستثمر بيحلم بيها.
مدبولي كمان قال إنه هيتابع بنفسه المشروع، ووعد أنه خلال 3 شهور هيرجع يزور القنطرة غرب، ويشوف مصانع أكتر اتفتحت، وكأنها بداية سلسلة نجاحات في قطاع الصناعة المصري.
الرسالة هنا واضحة، لما الدولة تستثمر صح في البنية التحتية والمستثمرين بييجوا، والمصانع بتقوم، بالتأكيد الاقتصاد هيكبر والـ25 مليار دولار اللي مستنيانا من القنطرة غرب مش هيبقوا مجرد رقم، لكن ده مستقبل بيتبني طوبة ورا التانية.
