انخفاض وبعده زيادة هي الأكبر.. إيه اللي هيحصل في اسعار الدهب بعد اجتماع الاحتياطي الفيدرالي الأمريكي
في اجتماع مهم جدا للبنك الفيدرالي الأمريكي اليوم الأربعاء ..ياتري اية اللي هيحصل في الاجتماع ده .. وآية اللي هيحصل في أسعار الذهب بعد الاجتماع ده.
في الوقت الحالي العالم كله مرتقب للقرارات اللي هتخرج عن اجتماع البنك الفيدرالي الأمريكي واللي هتكون بعد بكرة، خصوصا أن القرارات اللي بتخرج عن الاجتماع ده بتأثر علي البورصة السلعية في العالم كله، ده غير أنها بتأثر علي سوق الصرف بشكل عام.
واحدة من الحاجات اللي بتتاثر بقرارات اجتماعات لجنة البنك الفيدرالي الأمريكي هيا أسعار الذهب، واللي من وقت قريب انعقاد الاجتماع وهيا كل يوم في الطالع، واسعار المعدن الأصفر حققت ارتفاعات كبيرة جدا علي مدار الكام يوم اللي فاتوا بسبب قرب انعقاد اجتماع البنك الفيدرالي الأمريكي والتوقعات اللي بتأكد أنه سيصدر قرارات جديدة بخفض أسعار الفائدة، ده غير التوترات الجيوسياسية والاقتصادية العالمية اللي لها سبب مباشرة هيا كمان في الارتفاعات الأخيرة في أسعار الذهب.
طيب اية اللي هيحصل في أسعار الذهب في حالة صدور قرار جديد من البنك الفيدرالي الأمريكي بخفض أسعار الفائدة ؟.
كل الخبراء أجمعوا أنه في حالة صدور قرار من البنك الفيدرالي الأمريكي بخفض أسعار الفائدة فالسوق غالبا هيستقبل الخبر بإيجابية بالنسبة لأسعار الذهب، وهتكون الأسعار مرشحة أنها تكمل ارتفاع تاني خلال الأيام اللي جاية، خصوصا أن خفض الفائدة هتخلي سعر صرف الدولار بيضعف، وده هيدي فرصة للذهب انه أسعاره ترتفع بشكل اكبر .
الخبراء كملوا كلامهم وقالوا إن أسعار الذهب علي المدى القصير ممكن تشهد تقلبات، وممكن في بعض الأحيان أن الأسعار تتراجع بسبب جني أرباح أو بسبب ارتفاع سعر صرف الدولار، خصوصًا لو السوق كان متوقع القرار بالفعل، بس علي المدي الطويل هتكون في زيادات أكيدة في أسعار الذهب، وده هيخلي الإقبال علي شراء الذهب يرتفع خصوصا أن التوترات الجيوسياسية والاقتصادية لسه مستمرة ومرشحة الاستمرار علي مدار فترات طويلة جاية .
الخبراء قالوا كمان أن الاسعارممكن تكون مرشحة للانخفاض بشكل نسبي لتصحيح الأسعار، لكن الأكيد ان الاسعار مرشحة للزيادة وبدرجات كبيرة في الأوقات اللي جاية في ظل الاتجاه العالمي لخفض اسعار الفايدة .
