كنز دولارات جديد في مصر.. دخل للبلد أكتر من 10 مليار دولار خلال 38 شهر
هل المنطقة الاقتصادية لقناة السويس.. بقت فعلاً كنز دولارات جديد بيدخل عملة صعبة للبلد؟ وإزاي المنطقة دي نجحت تجذب 311 مشروع في 3 سنين بس؟ هل ده معناه إن فيه ثقة عالمية كبيرة في الاقتصاد المصري؟ أسئلة كتير مهمة.. هنجاوب عليها وهنكشف لكم أسرار المكان ده.. اللي بقى مركز جذب عالمي للاستثمارات.
من زمان.. وقناة السويس هي شريان الحياة للاقتصاد المصري.. لكن دلوقتي.. ضفاف القناة كلها بقت مصانع وموانئ ومراكز لوجستية.. بتفتح الباب لمرحلة جديدة من التنمية والنمو.
منطقة اقتصادية قناة السويس.. ليها خطة واضحة ومدروسة.. بدأت الأول بالبنية التحتية.. وبعدين مرحلة تسهيل الإجراءات.. ودلوقتي.. المرحلة الأهم.. توطين الصناعات المهمة.
والخطة دي.. بدأت تؤتي ثمارها بالفعل.. الأرقام بتقول إن المنطقة دي نجحت في إنها توقع عقود لـ 311 مشروع صناعي ولوجستي وخدمي في الـ 38 شهر اللي فاتوا بس..الاستثمارات دي.. قيمتها بتوصل لأكتر من 10.2 مليار دولار.. وكلها جاية من أكتر من 20 دولة من مختلف قارات العالم.. وده بيبين إن ثقة المستثمرين في مصر بقت كبيرة جدا.
وإيه اللي بيخلي المستثمرين الأجانب يجروا على المنطقة دي؟
الموضوع ليه أسباب كتير.. أولها.. إن المنطقة الاقتصادية لقناة السويس.. بقت مركز صناعي ولوجستي عالمي.. وعندها 6 موانئ بحرية.. و4 مناطق صناعية كبرى.. بتشتغل بكامل طاقتها..
كمان.. الهيئة بتستهدف 21 قطاع صناعي مختلف.. زي صناعة السيارات.. والأدوية.. والمنسوجات.. والطاقة الجديدة والمتجددة.. وده بيدي للمستثمرين اختيارات كتير..
ده غير الحوافز والتسهيلات اللي بيقدموها للمستثمرين.. زي الإعفاءات الجمركية والضريبية.. وتوافر الأيدي العاملة المدربة.. وده بيخلي بيئة الأعمال في المنطقة تنافسية جداً..
المنطقة الاقتصادية لقناة السويس.. مش بس بتجذب رؤوس أموال..دي بتجذب كمان خبرات وتقنيات حديثة.. بتساعد على تطوير الصناعة المحلية.. ووجود كل المستثمرين دول.. بيحول المنطقة دي لمركز عالمي للتعاون الدولي.. وبيأكد إن مصر بقت مركز جذب كبير للاستثمارات الأجنبية.
المؤكد ان اقتصادية قناة السويس.. بتتحول ببطء.. لكن بثبات.. لكنز دولارات حقيقي.. هيساعد على دعم الاقتصاد المصري.. وتوفير فرص عمل جديدة للشباب..
وده يخلينا نعرف قيمة وأهمية الاستثمار في البنية التحتية.. وان تسهيل الإجراءات.. هو مفتاح النمو الاقتصادي.. وإن أي بلد عايزه تتطور.. لازم تركز على المناطق الصناعية وتخليها جذابة للمستثمرين.
