5 جنيه زيادة.. سر ارتفاع أسعار الدواجن في مصر
أسعار الدواجن في مصر رجعت ترتفع تاني خلال الأيام اللي فاتت، وده حسب ما أكده سامح السيد، رئيس شعبة الدواجن بالغرفة التجارية بالجيزة.
السيد قال إن الكيلو من المزرعة وصل لـ63 جنيه بدل 59، وبيوصل عند المستهلك ما بين 73 جنيه مقابل 68 جنيه قبل كده، وده طبعًا حسب المنطقة وظروف العرض والطلب.
الزيادة دي – حسب كلام السيد– تعتبر سعر عادل سواء للمنتجين أو للمستهلك، خصوصًا مع ارتفاع معدلات السحب في الفترة الأخيرة، لكن في نفس الوقت، في بعض المحال مش بتخفض الأسعار لما تنزل، بينما مناطق تانية بترفعها بسرعة.
مصر حاليًا محققة اكتفاء ذاتي من الدواجن بنسبة 100% وفائض كمان يوصل لـ15%، مع خطط للتصدير للخارج، السوق بينتج يوميًا حوالي 4 مليون فرخة، وحجم الاستثمارات في القطاع ده وصل 200 مليار جنيه.
وعن أسباب الارتفاع، أوضح إن سعر الدولار في البنوك له تأثير مباشر، بجانب تكلفة مستلزمات الإنتاج والعرض والطلب.
أما التوقعات، فالسيد رجّح إن الأسعار ممكن ترجع تنخفض مع بداية العام الدراسي الجديد، لانشغال الأسر بمصاريف المدارس، وساعتها الكيلو ممكن ينزل تاني لـ68 جنيه.
