مش هيكون في ديون خارجية علينا للصين.. شوف اللي هيحصل في ديون مصر الخارجية للصين
نسبة كبيرة من ديون مصر الخارجية مستحقة لدولة الصين ولكن خلاص مصر وصلت لخطة للتخلص تماما من الديون دي وكمان هنحولها لاستثمارات في السوق المصري.. ياتري ده هيحصل ازاي.. وآية هيا خطة مصر للتخلص من ديون الصين.
التحديات الاقتصادية اللي فرضتها الظروف المحيطة بمصر للاسف اثرت علي إيرادات الدولة المصرية من أهم مصدرين خصوصا قناة السويس واللي إيراداتها تراجعت باكثر من 70% عن الارقام اللي كان بتتحقق قبل كده بنسبة وصلت لأكثر من 7 مليار دولار، ده غير التراجع اللي حصل في قطاع مهم زي قطاع السياحة واللي علي الرغم من وصوله لرقم قياسي بتسجيل 15.4 مليون سائح وتحقيق أكثر من 15 مليار دولار ولكنه كان مستهدف أنه يحقق ارقام اكبر من كده بكتير.
التحديات الخارجية خلت مصر تقترض من عده دول خارجية واحدة من الدول دي هيا الصين واللي لها نسبة كبيرة من الديوان الخارجية لمصر، وده كان سبب أساسي في ارتفاع الدين الخارجي لمصر لـ 155.2 مليار دولار، الدين الخارجي للصين منهم بيوصل لـ 8.2 مليار دولار.
طيب إزاي مصر هتتخلص من الديون دي وازاي هتحولها لاستثمارات في السوق المصري؟
في الفترة اللي فاتت مصر نجحت في توقيع مذكرة تفاهم خلال منتدى الحزام والطريق في اكتوبر 2023 مع الحكومة الصينية لمبادلة الديون مع الصين وتحويلها لتمويل مشاريع تنموية، وبعدها مصر بدأت مفاوضات مع الصين لمبادلة دين بقيمة هتترواح من 100 إلى 120 مليون دولار لمشاريع تنموية خضراء.
لازم نكون عارفين ان مصر لها اكثر من تجربة في فكرة تحويل الديون الخارجية الي استثمارات في السوق المصري، ومصر نفذت برامج مبادلة ديون مع إيطاليا وألمانيا بقيمة نحو 730 مليون دولار وحولتهم لاستثمارات في 120 مشروع تنموي في مجالات زي الزراعة والتعليم والطاقة والمياه.
فكرة تحويل الديون الخارجية علي مصر لاستثمارات في السوق المصري واحدة من أهم التحركات اللي بتقوم بيها الحكومة ودي فيها أكثر من شق أولهم أن الدولة بتتخلص من عبئ كبير الديون الخارجية وده بيكون حمل ثقيل علي الحكومة في حالة لو سددت الديون دي من الناتج القومي المصري خصوصا أن الدين الخاؤجي يستحوذ علي نسبة كبيرة منه، وبالتالي الدعم المخصص لمجالات زي الصحة والتعليم بيكون قليل جدا ده غير أنه بيكون سبب أساسي من أسباب ارتفاع معدلات التضخم.
تاني سبب بيخلي الدولة تكون حريصة علي التخلص من اعباء الديون وتحويلها للاستثمارات في السوق المصري هيا أن بتتخلص من دين خارجي وكمان يتحوله لاستثمارات وإنتاج في السوق المصري، واحنا كده اتخلصنا من هم الديون وكمان حولناها لإنتاج في بيسد النقص المحلي من الإنتاج وكمان بيكون في فائض للتصدير.
