5 سلع تتصدر صادرات مصر إلى الإمارات.. قفزة بـ 153%
في 6 شهور بس.. مصر حققت قفزة تاريخية في تجارتها مع الإمارات.. أرقام غير مسبوقة، وصادرات بتقفز 153% بقيادة "اللؤلؤ والأحجار الكريمة".
في نفس الوقت واردات مصر بتتراجع.. يعني الميزان التجاري لأول مرة في صالح مصر بشكل كبير.. طب إيه اللى حصل في النصف الأول من 2025.. وإيه أكتر السلع اللي بتصدرها مصر للإمارات؟
الجهاز المركزي للتعبئة العامة والإحصاء أعلن أرقام قوية جدًا:
الصادرات المصرية إلى الإمارات وصلت 3.8 مليار دولار في النصف الأول من 2025، مقابل 1.5 مليار دولار في نفس الفترة من 2024.
يعني معدل نمو 153.3%.. قفزة استثنائية في الصادرات المصرية إلى الإمارات.
في نفس الوقت: الواردات المصرية من الإمارات سجلت مليار دولار بس، مقابل 1.2 مليار العام الماضي، بتراجع 16.6%.
النتيجة؟ التبادل التجاري الكلي بين البلدين ارتفع لـ 4.8 مليار دولار مقابل 2.7 مليار فقط السنة اللي فاتت.. يعني زيادة 77.7%.
طب إيه سر القفزة دي؟
الصادرات المصرية اعتمدت بشكل أساسي على:
• اللؤلؤ والأحجار الكريمة والحُلي: 3.2 مليار دولار.
• الأجهزة الكهربائية: 151 مليون دولار.
• الخضر والفاكهة: 111 مليون دولار.
• السيارات والجرارات: 33 مليون دولار.
• محضرات الخضر: 26 مليون دولار.
أما أهم واردات مصر من الإمارات فكانت:
النحاس ومصنوعاته: 293 مليون دولار، و اللدائن: 174 مليون دولار، والحديد الصلب: 83 مليون دولار، و الأجهزة الكهربائية وأجزاؤها: 68 مليون دولار، والألومنيوم: 31 مليون دولار.
مش بس تجارة كمان الاستثمارات بين مصر والإمارات بتشهد نمو، فالاستثمارات الإماراتية في مصر سجلت 2.2 مليار دولار بالنصف الأول من 2024/2025 مقابل 2.1 مليار دولار العام اللي قبله.. كمان الاستثمارات المصرية في الإمارات ارتفعت لـ 750.1 مليون دولار مقابل 616.2 مليون يعني نمو 21.7%.
أما على مستوى التحويلات المالية، فالمصريين العاملين في الإمارات حوّلوا لمصر 1.8 مليار دولار خلال العام المالي 2023/2024، مقابل 2.1 مليار دولار السنة اللي قبلها.. في المقابل، تحويلات الإماراتيين العاملين في مصر بلغت 31.6 مليون دولار مقابل 35.5 مليون دولار.
ماننساش إن مصر بعدد سكانها الضخم 108 مليون نسمة بتمثل سوق واعدة مقارنة بالإمارات اللي عدد سكانها حوالي 11.4 مليون نسمة.
والمصريين في الإمارات نفسهم عددهم كبير جدًا، حوالي 975 ألف مواطن حتى نهاية 2023، وده عنصر داعم قوي للعلاقات الاقتصادية والتجارية.
اللي بيحصل بين مصر والإمارات مش مجرد طفرة عابرة.. لكن مؤشر على شراكة استراتيجية بتتوسع في التجارة، الاستثمار، والتحويلات.
