تحركات جريئة في بنوك مصر.. إيه اللي بيحصل قبل اجتماع المركزي؟
يا ترى ليه بعض البنوك بدأت تتيح شهادات ادخار بعوائد مرتفعة لآجال أطول ؟ وايه علاقة ده بخطة هيكلة الودايع؟ وليه فجأة كده.. أغلب البنوك في مصر بدأت تتسابق.. وتتخانق مع بعض عشان تجذب مدخرات العملاء.. وتحديدا بتعرض شهادات بعوائد خيالية.. بس لفترات طويلة..؟ وهل التحركات اللى بتحصل فى البنوك مؤخرا ليها علاقة بالقرار المرتقب للجنة السياسة النقدية في البنك المركزي؟
إحنا الفترة اللي فاتت.. كنا متعودين على الشهادات اللي بعائد شهري أو سنوي مرتفع.. لدرجة إن ناس كتير كانت بتبيع دهبها وعربياتها عشان تحط فلوسها في الشهادات دي.. زي شهادات الـ 27% اللي كانت بتتصرف سنويا.. وشهادات الـ 23.5% اللي كانت بتتصرف شهريا.. بس فجأة.. البنوك.. تحديدا أكبر بنكين في مصر.. البنك الأهلي وبنك مصر.. وقفوا الشهادات دي.. وده كان بالتزامن مع قرار البنك المركزي بخفض الفايدة.. ولأول مرة من 4 سنين ونص.. القرار ده عمل ضجة كبيرة.. وده لإن ناس كتير كانت متعودة على الفايدة العالية.. وكانت معتبرة إن دي هي أسرع وأضمن طريقة عشان تكسب.. خصوصا مع تراجع قيمة الجنيه.. وارتفاع التضخم.
بس اللي حصل بعد كده.. كان غريب جدا.. البنوك مابطلتش.. بالعكس.. بدأت تطرح شهادات جديدة.. ولكن بشكل مختلف.. شهادات طويلة الأجل.. يعني مدتها من 3 لـ 5 سنين.. وعوائدها بتبدأ من 27% للسنة الأولى.. وبتتدرج وتنزل بعد كده.
بس ليه التركيز على الشهادات طويلة الأجل دي..؟
الإجابة ببساطة.. إن البنوك عندها هدف استراتيجي.. البنوك مش بتفكر في الشهر أو السنة الجاية بس.. هما بيفكروا في المستقبل البعيد.. وعايزين يضمنوا إن عندهم سيولة نقدية.. وفلوس مستقرة.. يقدروا يوظفوها.. ويشغلوها في استثمارات طويلة الأجل.. وخصوصا في أنشطة الإقراض.
فيه خبراء ومحللين اقتصاديين.. بيقولوا إن البنوك بتعمل كده عشان كذا سبب.. أولها انها عايزة تحافظ على قاعدة عريضة من المدخرات المستقرة.. لإن الودائع قصيرة الأجل بتكون متقلبة.. وممكن العميل يسحبها في أي وقت.. وده ممكن يسبب أزمة سيولة للبنوك.. ثانياً.. البنوك بتجهز للمرحلة الجاية.. واللي متوقع فيها إن أنشطة الإقراض هتزيد.. لإن الفايدة على القروض هتقل.. وده هيشجع الشركات والأفراد على الاقتراض.. وبالتالي.. البنوك محتاجة سيولة مستقرة وطويلة الأجل عشان تقدر تغطي طلبات القروض دي.. وتلبي احتياجات العملاء.. ثالثاً.. البنوك بتحاول تواكب التضخم.. حتى لو الفايدة هتنزل تدريجيا.. لإن المتوقع إن التضخم نفسه هينزل.. وده اللي البنك المركزي بيحاول يوصله.. وده هيخلي العائد الحقيقي على الشهادات معقول.. ومايسببش خسارة للعميل.
البنوك دلوقتي بتتنافس بشكل واضح جدا.. لدرجة إن كل بنك بيحاول يقدم ميزة جديدة عشان يجذب عملاء أكتر.. فبنك العربي الأفريقي الدولي.. عمل شهادة بعائد تراكمي.. يعني الفايدة بتتراكم على مدار 4 سنين.. وتتصرف كلها في الآخر.. وبتوصل لـ 100%.. وده رقم مغري جدا.. في المقابل.. المصرف المتحد.. قدم شهادة بعائد تراكمي برضه.. بس الفايدة بتنزل تدريجيا كل سنة.. وبنك saib.. طرح شهادة بعائد سنوي ثابت 20%.. وكل ده بيوريك قد إيه البنوك بتحاول تبتكر.. وتنوع في منتجاتها عشان تجذب كل أنواع المدخرات.. من أول العميل اللي بيفكر على المدى القصير.. لحد العميل اللي بيفكر على المدى الطويل.
اللي بيحصل ده مش صدفة ولكن خطة استراتيجية من البنوك.. عشان تعيد هيكلة محافظها من الودائع.. وتضمن إن عندها سيولة مستقرة.. تقدر تشغلها وتستثمرها بشكل فعال.. وتواكب التغيرات الاقتصادية.. خصوصا مع توقعات بانخفاض التضخم.. واستمرار انخفاض الفايدة.. البنوك بتستعد للمستقبل.. وبتجهز نفسها لمرحلة جديدة من الاستثمار والإقراض.. اللي هتحتاج سيولة طويلة الأجل عشان تنجح.
