الدهب بينزل يوم بعد يوم.. شوف السبب وإيه علاقة التراجع بالدولار
يا ترى ليه الدهب بينزل يوم ورا يوم، رغم إن الأوقية عالميا بتطلع، طب إزاي وليه، وإيه علاقة الموضوع بالدولار؟
في الحقيقة، أسعار الدهب في مصر نزلت حوالي 5 جنيه للجرام رغم إن الأوقية في البورصة العالمية زادت 7 دولار ووصلت ل 3355 دولار.
ونقدر نقول ان السبب الرئيسي هنا هو تراجع الدولار قدام الجنيه، يعني القوة الشرائية للعملة الأمريكية ضعفت شوية، كمان فب تقارير طلعت من أمريكا عن التضخم وقالت التقارير إن الأسعار بتزيد بمعدل أبطأ من المتوقع، وده خلا الفيدرالي الأمريكي يفكر جديا يخفض الفايدة في اجتماعه الجاي في نص سبتمبر الجاي، وطبعا أي خفض للفايدة بيضغط على الدولار ويقوي موقف الدهب.
لكن الغريب إن السوق المصري ما استفادش من صعود الأوقية، والسبب إن لما الدولار نفسه بينزل فالدهب عندنا بيخسر الدعم اللي كان بياخده من قوة العملة الأمريكية، فحتى مع صعود عالمي فالسعر هنا ممكن يهبط.
وفي الخلفية في تغييرات كبيرة بتحصل، الحكومة عندنا بتجهز قوانين جديدة وصناديق استثمار في الدهب، وكمان في خطة لإنشاء مصافي لتكرير الدهب جوه مصر، والخطوة دي لو تمت هتحول مصر لمركز إقليمي في الصناعة والتجارة دي وهتقلل الاعتماد على بره.
كمان، ما نقدرش ننسى إن الأحداث السياسية والتجارية في العالم بتأثر جامد على الدهب، زي المفاوضات التجارية بين أمريكا والصين أو أي قرارات تخص الرسوم الجمركية على المعادن، فكل ده بيحرك السوق في ثانية.
بردو، في بنوك مركزية في دول كتير بقت بتشتري دهب بكميات ضخمة كنوع من التحوط ضد الأزمات الاقتصادية والسياسية، وده بيزود الطلب ويضغط على الأسعار لفوق، فعشان كده أيذى خبر عن شراء أو بيع كميات كبيرة من الدهب بيكون له تأثير فوري على السوق.
والخلاصة، هي ان الدهب حاليا ماشي في موجة تذبذب بين صعود عالمي وضغط محلي، ولو الدولار فضل ضعيف الفترة الجاية بممكن نشوف الأسعار هنا في مصر تميل للانخفاض شوية حتى لو بره بتعلى.
