بتوصل لـ30%.. شوف كواليس لجنة تسعير المواد البترولية لمناقشة أسعار البنزين والسولار في مصر
واضح أن نهاية 2025 مش هتكون سنة سعيدة علي المصريين خصوصا أنه هتكون فيها صدمة كبيرة للمواطنين بسبب أسعار البنزين والسولار.. ياتري اية اللي هيحصل في أسعار البنزين والسولار.. وهل خلاص الدولة هتشيل أيدها من الدعم فيهم.
رفع الدعم واحد من الملفات المهمة جدا اللي الحكومة شغالة عليها وبقوة في الوقت الحالي خصوصا أنه بند مهم جدا في الخطة الاقتصادية اللي الدولة المصرية اتفقت عليها مع صندوق النقد الدولي لإعادة بناء برنامج اقتصادي مصري قوي قادر علي مواجهة كل الصدمات الخارجية وده اللي نجحنا فيه حتي الآن، خصوصا أن البرنامج الاقتصادي المصري بيعد واحد من اقوي البرامج الاقتصادية في العالم واللي اغلب المؤسسات الدولية أشادت بيه.
خطة رفع الدعم الحكومي ماشية في كل القطاعات الحكومية بشكل واضح جدا حتي الآن وأحد من القطاعات دي هو قطاع البترول واللي بدأ من 2016 خطة رفع الدعم الحكومي عن المواد البترولية خصوصا البنزين والسولار وان كان البنزين اللي اخذ الجزء الأكبر من خطة رفع الدعم، الحكومة أعلنت عن تشكيل لجنة تحت اسم لجنة تسعير المواد البترولية ده هدفها النظر في أسعار المواد البترولية في مصر وبتكون خطة التسعير بناء علي السعر العالمي للمواد البترولية وسعر الصرف في مصر، واللجنة دي بتضم عدد كبير من ممثلي الهيئات والقطاعات التابعة لوزارة البترول والثروة ووزارة المالية، وبتعقد اجتماعها الدوري كل 3 اشهر لمناقشة أسعار المواد البترولية في مصر .
طيب اية اللي هيحصل في أسعار البنزين والسولار في مصر الفترة اللي جاية ؟.
لازم نكون عارفين ان أسعار المواد البترولية في مصر مستقر من أكثر من 4 شهور حاليا وتحديدا من وقت آخر زيارة أقرتها وزارة البترول والثروة المعدنية في شهر ابريل اللي فات و وقتتها لجنة تسعير المواد البترولية قررت رفع أسعار بنزين 95 من 17 إلى 19 جنيه للتر، ورفع أسعار بنزين 92 من 15.25 إلى 17.25 جنيه لتر، ورفع أسعار بنزين 80 من 13.75 إلى 15.75 جنيه، ووقتها الحكومة أعلنت أنه مش هيكون في أي زيادات جديدة في أسعار المواد البترولية في مصر لمدة 6 شهور كاملة والفترة دي هتنتهي في شهر أكتوبر اللي جاي .
حاليا لجنة تسعير المواد البترولية بصدد عقد اجتماعها الدوري واللي هيكون في شهر سبتمبر اللي جاي لمناقشة الأسعار الجديدة للمواد البترولية خصوصا البنزين والسولار وده اعلي حاجتين الحكومة بتخصص لهم دعم مالي في الحكومة، وكل التقارير بتأكد أن القرار اللي هيخرج عم لجنة تسعير المواد البترولية هيكون بزيادة أسعار المواد البترولية في مصر بشكل عام بنا فيهم السولار وأنبوبة البوتاجاز واللي كانوا احيانا خارج خطة التسعير الجديدة للمواد البترولية، وان الزيادات الجديدة في الأسعار هتتعدي 30% خصوصا أن الزيادات الجديدة في الأسعار المرة دي هتقلل بشكل شبه نهائي الدعم الحكومي للمواد البترولية.
