مشروعات بـ 2 مليار دولار هتغير قواعد اللعبة.. تعاون مصري أردني هيعمل قلبان
يا ترى إيه اللى ممكن يحصل لو مصر والأردن قرروا يتعاونوا في مشاريع عملاقة ؟ هل ممكن الشراكة دي تغير شكل الاقتصاد في المنطقة كلها؟ وإزاي التعاون ده ممكن يضاعف فلوسنا ويوصل التبادل التجاري لأرقام قياسية؟
مصر والأردن أعلنوا عن اتفاق على تنفيذ عدد كبير من المشاريع المشتركة .. مشاريع قيمتها الإجمالية 500 مليون دولار .. الاتفاق ده جه في توقيت مهم جدا .. بالتزامن مع انعقاد اللجنة المشتركة بين البلدين في العاصمة الأردنية عمان.
الخبر ده مش مجرد اتفاقيات على ورق .. ولكن خطة عمل متكاملة عشان تستثمر في نقاط القوة عند البلدين .. وتفتح مجالات جديدة للتعاون .. القطاعات اللي هيتم التركيز عليها في المشاريع دي متنوعة ومهمة جدا .. زي الغاز الطبيعي .. والربط الكهربائي .. والبنية التحتية .. وصناعة الأدوية .. والنقل والمواصلات .. وتكنولوجيا المعلومات .. ده غير قطاعات تانية كتير زي الإسكان والسياحة وحماية المستهلك.
كل القطاعات دي بتؤكد على عمق العلاقة الاستراتيجية بين البلدين .. ورغبتهم في تحقيق التكامل الاقتصادي .. وده بيطرح سؤال مهم .. إيه الهدف من كل ده؟
الهدف ببساطة هو إنهم يضاعفوا حجم التبادل التجاري بينهم .. المسؤولين في البلدين بيستهدفوا إنهم يوصلوا بالتبادل التجاري لـ 2 مليار دولار سنويا .. الرقم ده يعتبر ضعف الرقم الحالي اللي وصل لمليار دولار في سنة 2024.
خلينا ندخل في تفاصيل المشاريع دي .. ونشوف إزاي ممكن تغير شكل الاقتصاد.
أولًا.. الربط الكهربائي
الربط الكهربائي بين مصر والأردن هو واحد من أهم المشاريع دي .. مصر بتسعى إنها تضاعف قدرة الربط الكهربائي مع الأردن 4 مرات .. يعني بدل ما كانت 500 ميجاواط .. هتكون 2000 ميجاواط .. وده هيساعد البلدين في تحقيق استقرار أكبر في شبكات الكهرباء .. وكمان هيفتح الطريق لمشاريع ربط أكبر مع دول تانية في المنطقة .. زي مشروع الربط مع السعودية اللي مصر بتشتغل عليه دلوقتي.
ثانيًا.. صناعة الأدوية
صناعة الأدوية من القطاعات الواعدة جدا في البلدين .. التعاون ده هيخلي فيه فرصة لإنتاج أدوية مشتركة .. والاستفادة من خبرات وقدرات البلدين .. وده ممكن يخليهم قادرين على إنهم ينافسوا في أسواق جديدة.
ثالثًا.. النقل والمواصلات والبنية التحتية
التعاون في النقل والبنية التحتية مهم جدا عشان يسهل حركة التجارة بين البلدين .. سواء كانت سلع أو أفراد .. وده هيقلل تكلفة النقل .. وهيخلي عملية التبادل التجاري أسرع وأكثر كفاءة.
اللى بيحصل بين مصر والأردن دليل على إن الدول العربية ممكن تتعاون مع بعض .. وتستفيد من نقاط قوتها .. عشان تحقق التنمية الاقتصادية المرجوة .. الأيام اللي جاية هتبين إزاي المشاريع دي هتتنفذ على أرض الواقع .. وهل فعلا هتوصل بالتبادل التجاري للأرقام المستهدفة.
الأكيد إن التعاون ده هيكون له تأثير إيجابي على اقتصاد البلدين .. وهيكون خطوة مهمة نحو تحقيق التكامل الاقتصادي في المنطقة.
