من أمريكا.. مفاجأة سارة للحكومة تقربنا من تحقيق حلم الاكتفاء الذاتي من المواد البترولية
مصر عندها اختبار صعب جدا لوقف استيراد المواد البترولية من الخارج.. بس المرة دي مصر جت لها مفاجاة سعيدة جدا من عن طريق أمريكا.. ياتري اية هيا المفاجاة دي.. وأزاي هتساعد مصر من التخلص من استنزاف الدولار لاستيراد المواد البترولية.
أكثر من سنة حاليا مرت علي الحكومة وهيا فاتحة باب استيراد المواد البترولية من الخارج خصوصا الغاز الطبيعي والمازوت واللي الحكومة فتحت باب الاستيراد فيهم وبكميات كبيرة جدا بسبب النقص اللي حصل للكميات المطلوبة لتغطية احتياجات محطات توليد الكهرباء واللي بسبب نقصها اضطرت الدولة لتطبيق خطة تخفيف الأحمال وقطع الكهرباء علي الناس في الشوارع والبيوت لأكثر من سنة كاملة، وكانت واحدة من الأزمات الشهيرة اللي مرت علي مصر.
المبالغ الكبيرة اللي بتصرفها الحكومة، خلت الدولة تبدا تدور علي حلول لحل أزمة نقص المواد البترولية في السوق المحلي، وكان الحل من توسيع الشراكة بين الحكومة والقطاع الخاص في الدخول للسوق المصري والتنقيب عن أبار جديدة للمواد البترولية، وكانت البداية بسن تشريعات جديدة تحفز دخول القطاع الخاص والاستثمارات الأجنبية للسوق المصري في مجالات التعدين والتنقيب عن البترول، عن غير الالتزام الحقيقي من الحكومة في سداد مستحقات الشركات أول بأول، وده اللي خلي السوق المصري بقي سوق جاذب ومستهدف وعليه طلب من عدد كبير من كبري الشركات العالمية.
الإجراءات اللي اخذتها الحكومة خلت عدد كبير من الشركات العالمية عندها رغبة حقيقة في الدخول للاستثمار في سوق التعدين في مصر، واحدة من الشركات دي شركة فالكو للطاقة الأمريكية واللي قدرت خلال الربع الأول من 2025 في حفر 6 آبار جديدة للبترول في مصر، وحاليا الشركة بصدد القيام بعمليات التكسير الهيدروليكي، واتعمل له تحليل تفصيلي لتقييم إمكانات مخزون الآبار بهدف زيادة انتاجهم .
لازم نكون عارفين أن شركة فالكو للطاقة الأمريكية واحدة من اكبر الشركات اللي لها استثمارات في السوق المصري وبيوصل حجم انتاجها من المواد البترولية ما بين 9750 و11 ألف برميل يوميا، وفي الفترة اللي فاتت الحكومة سلمتها أكثر من 5 مليون دولار من مستحقاتها اللى كانت عندنا .
الانتاج الجديد اللي هيدخل في قائمة الشركات اللي دخلت السوق المصري مش هو الأول ولا هيكون الاخير، خصوصا أن السوق المصري في الوقت الحالي بيشهد يوم ورا التاني أعلان لكشف بترولي جديد واللي كان أخرهم شركة دانة غاز الإماراتية واللي بتعد سابع أكبر منتج في مصر، واحتياطياتها المثبتة من الغاز والمكثفات بتوصل لـ 22.1 مليون برميل نفط مكافي، أعلنت عزمها حفر البئر الثاني ضمن برنامجها الاستثماري في مصر خلال شهر أغسطس الحالي، واللي متوقع أنه يوصل انتاجه ل5 مليون قدم مكعبة يوميا من حقل بيجوانا 2، و3 مليون قدم مكعبة يوميا من حقل بلسم 3.
