حيرة وأسعار نار ومبيعات في الأرض.. إيه اللي بيحصل داخل سوق العربيات في مصر؟
يا ترى إيه اللي بيحصل في سوق العربيات في مصر حاليًا؟ .. وليه رغم إن الأسعار نزلت كتير.. بس لسه مفيش حد بيشتري؟ .. وهل اللي جاي أحسن ولا لأ؟ .. وإزاي حرب الأسعار دي بتلخبط السوق أكتر؟ .. وإيه علاقة كل ده بفوائد البنوك والتقسيط؟ كل دي أسئلة مهمة بتدور في بال أي حد بيفكر يشتري عربية جديدة.
تخيل كده معايا إنك داخل محل.. الحاجة اللي كنت بتحلم بيها سعرها نزل 20%.. يعني ممكن توفر أكتر من 200 ألف جنيه في بعض الموديلات الفخمة.. بس لسه متردد ومش قادر تاخد قرار الشراء.. ليه؟ .. ده بالظبط اللي بيحصل في سوق العربيات في مصر دلوقتي.
كتير من خبراء السيارات بيقولوا إن فيه طلب حقيقي.. الناس نفسها تشتري.. بس في نفس الوقت فيه حالة ترقب كبيرة مسيطرة على الكل .. الناس مستنية الأسعار تنزل أكتر وأكتر.
فاكرين أيام الأوفر برايس اللي كان بيخلي سعر العربية يزيد 200 أو 300 ألف جنيه فوق سعرها الرسمي؟ .. الأيام دي خلاص انتهت.. الوكلاء بدأوا ينزلوا الأسعار بشكل حقيقي.. لدرجة إن بعض العربيات نزل سعرها 20% وأكتر.. وخبراء كتير بيقولوا إن الأسعار دي هي الأسعار الطبيعية اللي كانت المفروض تكون عليها من الأول.. بعد ما القيود على الاستيراد اتفكت والدولار بقى متوفر.. ولكن.. فيه حاجة غريبة جدًا بتحصل.. وهي إن نزول الأسعار ده مخلي الناس تستنى أكتر.. وماتشتريش دلوقتي.. كإنهم بيقولوا "طالما الأسعار بتنزل.. يبقى ممكن تنزل أكتر.. ليه نستعجل؟
وده بالظبط اللي بيقوله رئيس رابطة السيارات في مصر أسامة أبو المجد.. اللى أكد إن وقت الأزمة.. لما الأسعار بتزيد.. الناس بتجري تشتري عشان تلحق قبل ما الأسعار تغلى أكتر.. لكن لما السوق يبقى هادي والأسعار بتنزل.. الناس بتستنى وبتتردد.
طب إيه تاني اللي بيخلي الناس مش بتشتري؟
التنوع الكبير في الموديلات .. دلوقتي أي حد عايز يشتري عربية بيلاقي نفسه قدام بحر من الاختيارات.. كل يوم شركة بتنزل موديل جديد.. شركات زي رينو بتنزل 4 فئات جديدة زي داستر وميجان وأوسترال وكارديان.. إكسيد بتنزل موديلات زي RX وVX .. نيسان بتنزل جوك وقشقاي وإكس تريل.. وحتى النصر للسيارات الحكومية رجعت تاني بموديلات كهربائية وهجينة وبنزين.
ده غير إن عدد المصانع اللي بتجمع عربيات في مصر زاد بشكل كبير جدًا.. لدرجة إنه وصل لـ 25 مصنع.. منهم 7 مصانع اتعملت السنة دي بس.. كل ده خلق منافسة قوية جدًا بين الوكلاء.. بس في نفس الوقت خلّى العميل في حالة حيرة شديدة.. مش عارف يختار إيه.. وكل شوية يقول "أستنى شوية أشوف إيه اللي هينزل تاني".. وبتكون النتيجة إن قرار الشراء بيستنى.
في سبب تالت وخطير جدًا بيأثر على سوق العربيات.. وهو قروض البنوك والتقسيط .. معظم الناس اللي بتشتري عربيات دلوقتي بتعتمد على التقسيط.. عشان كده.. كل ما الفايدة تنزل.. كل ما القسط الشهري يقل.. وسعر العربية يقل بشكل عام.
رئيس الشعبة العامة للسيارات نور درويش بيقول إن مبيعات العربيات دلوقتي حوالي 250 ألف عربية في السنة.. مقارنة بـ 450 ألف عربية سنة 2010 .. يعني تقريبًا نص المبيعات التاريخية.. وده بسبب ارتفاع الأسعار في السنين اللي فاتت اللي خلى العربيات فوق قدرة ناس كتير..
ورغم إن البنك المركزي نزل الفايدة 3.25% من بداية السنة.. بس لسه الفايدة مرتفعة.. والناس مستنية إنها تنزل أكتر.. فيه توقعات بتقول إن الفايدة ممكن تنزل لحد 4% قبل نهاية السنة.. وده هيخلي كتير من الناس اللي مستنية تشتري.
