سر زياد صادرات الصناعات الغذائية خلال النصف الأول من 2025.. شوف التفاصيل
يا ترى إيه اللي خلى صادرات الصناعات الغذائية المصرية تحقق أرقام قياسية في أول 6 شهور من 2025، وازلي وصلت ل3.4 مليار دولار؟
الحكاية بدأت لما المجلس التصديري للصناعات الغذائية أعلن إن القطاع حقق نمو 6% مقارنة بنفس الفترة من 2024، يعني زودنا حوالى 182 مليون دولار زيادة، وده أعلى رقم صادرات نوصل له في نص سنة من ساعة ما بدأنا نسجل البيانات دي.
أما عن أكتر الأسواق اللي اشترت مننا، فالدول العربية كانت فى الصدارة ب 1.577 مليار دولار يعني حوالي نص الصادرات تقريبا، ورغم كده سجلوا تراجع بسيط بنسبة 4%، وجه بعدها الاتحاد الأوروبي ب 715 مليون دولار بزيادة 2%، وبعدين أفريقيا غير العربية ب 249 مليون دولار بزيادة 9%، والمفاجآة بقى ان أمريكا لوحدها اشترت ب 230 مليون دولار، وده عمل نمو 47% وبيعتبر طفرة كبيرة.
ولو جينا نشوف أهم الدول، فالسعودية كانت الأولى ب 258 مليون دولار، بعدها أمريكا ب 230 مليون، وبعدين السودان وليبيا وهولندا و الأردن والإمارات والجزاير بعدين العراق وفي الاخر إيطاليا.
أما عن السلع اللي عملت فرق، فالمفاجأة إن الفراولة المجمدة كانت البطل بصادرات وصلت ل 442 مليون دولار بزيادة بنسبة 75%، بعدها مركزات صناعة الكولا وزيوت الطعام بعدين السكر والدقيق.
ونقدر نقول، ان النجاح ده وراه أكتر من سبب، أهمهم تحسين جودة المنتج المصري والالتزام بالمعايير العالمية اللي بتخلي السلع دي تنافس في أسواق كبيرة زي أوروبا وأمريكا، وكمان في حملات ترويجية ومعارض دولية ساعدت في جذب مشترين جداد.
والملفت هنا، إن في توجه واضح لاختراق أسواق غير تقليدية زي الصين ولبنان وألمانيا اللي حققوا أعلى معدلات نمو في استيراد المنتجات المصرية خلال الفترة دي، وده معناه إن الخطة مش بس الحفاظ على العملاء الحاليين لكن كمان فتح أبواب جديدة.
وبردو، الصناعات الغذائية استفادت من التطور في تكنولوجيا التصنيع والتغليف، وده ساعد في زيادة عمر المنتجات على الأرفف وحافظ على جودتها لحد ما توصل للمستهلك النهائي في أي حتة في العالم.
وفي جانب مهم برضه وهو الشحن، لأن تحسين خدمات اللوجستيات وخفض وقت التصدير بيخلى المنتج يوصل أسرع وأرخص ودي ميزة بتخلي المستوردين يفضلوا المنتج المصري على منافسين تانيين.
والخلاصة هي إن الصناعات الغذائية المصرية ماشية في طريق تصاعدي، ولو قدرنا نحافظ على الوتيرة دي ونوسع أكتر في التصدير، ممكن نشوف أرقام أكبر بكتير في نهاية 2025.
