الدهب يتراجع مع قوة الدولار.. شوف المعدن الأصفر رايح على فين؟
يا ترى إيه اللي حصل للدهب، ليه رجع تاني ينزل بعد ما كان طالع ومكسر الدنيا، هل الدولار هو السبب ولا في حاجة تانية بتحصل فى الكواليس؟
في الحقيقة أسعار الدهب رجعت تنزل تاني، وده بسبب إن الدولار رجع يقوة، وده معناه إن الناس بدأت تسيب الدهب وتروح تستثمر في الدولار والسندات، لأن الدولار بقى مغري أكتر كمخزن آمن تحط فيه فلوسك خاصة مع صعود عوائد السندات الأمريكية.
وفي الساعات الأخيرة، جرام الدهب عيار 21 نزل 25 جنيه، وبقى ب 4565 جنيه، والأوقية نزلت بردو حوالى 25 دولار وبقت ب 3363 دولار. يعني لو بتسأل نفسك تشتري ولا تبيع فلازم الأول تعرف الصورة كاملة.
دلوقتي، الدولار مش بيقوى من فراغ، ده الأسواق كلها مستنية بيانات اقتصادية جاية من أمريكا، ودي ممكن تغير خريطة السياسة النقدية كلها، زي مثلا تقرير الوظائف اللي نزل يوم الجمعة اللي فات واللي خيب التوقعات، وأمريكا أضافت 73 ألف وظيفة بس في يوليو بدل 110 ألف، وده أقل رقم من بداية السنة، وكمان معدل البطالة طلع ل 4.2%،وده بيخلي ناس كتير تتوقع إن الفايدة في أمريكا ممكن تتخفض قريب بس في نفس الوقت الدولار لسه قوي وده بيضغط على الدهب.
بردو، الدهب نزل من أعلى مستوى ليه في أسبوعين، فكا وصل ل 3385 دولار ونزل تاني بسبب ارتفاع الدولار وعوايد السندات.
وعلى الجانب التاني، رجع ترامب يفرض رسوم جمركية على دول كتير بنسب من 10% ل41%، ودع زود المخاوف الجيوسياسية وخلا بعض المستثمرين يرجعوا يبصوا على الدهب كملاذ آمن، بس لسه الدولار هو اللاعب الأساسي في السوق.
طيب، نرجع للأسعار، عيار 24 بقى ب 5217 جنيه، وكمان عيار 18 سحل 3913 جنيه، وعيار 14 ب 3044 جنيه، والجنيه الدهب ب36520 جنيه. وده بعد ما كان عيار 21 فتح التداول عند 4600 جنيه وقفله على 4565 جنيه.
طيب .. هل ده معناه إن وقت الشراء قرب، ولا لسه فيه هبوط تاني؟
ده اللي هنعرفه خلال الأيام الجاية بعد ما تطلع بيانات زي مؤشر مديري المشتريات للقطاع الخدمي في أمريكا ومزاد سندات الخزانة لأجل 10 سنين وكمان قرار بنك إنجلترا بخصوص الفايدة وطلبات إعانة البطالة يوم الخميس، يعني السوق على صفيح ساخن، وكل بيان ممكن يحرك الدهب لفوق أو لتحت.
والخلاصة، هي انك لو ناوي تشتري أو تبيع دهب فركز مع الدولار وتابع البيانات الاقتصادية، وساعتها بس خد قرارك.
