ثورة الذهب في مصر.. منجم السكري "يفجرها" ويرفع الإنتاج 9%.. هل يكسر أسعار تاريخية قريبا؟
يا ترى منجم السكري ليه بيطلع تريند دلوقتي، بيعمل إيه اليومين دول، هل فعلا الإنتاج زاد، وهنوصل لفين؟.. لو مهتم بالدهب وباللي بيحصل في كنوز مصر المدفونة.
في تقرير جديد طالع من شركة أنجلو جولد أشانتي، اللي بتمتلك منجم السكري للدهب، أعلنوا فيه إن إنتاج المنجم زاد 9% خلال أول 6 شهور من سنة 2025، يعني بدل ما كانوا طالعين ب225 ألف أوقية في نص السنة اللي فاتت، المرة دي طلعوا ب246 ألف أوقية.
طب إزاي ده حصل؟
السر في نقطتين مهمين. أولهم ان الخامات اللي بيشتغلوا عليها كانت جودتها أعلى، وثاني حاجة هي إن معدل الاستخلاص زاد، يعني بيعرفوا يستخرجوا دهب أكتر من نفس كمية الخام، ورغم إنهم قللوا شوية من طحن الخام عشان أعمال صيانة للمطحنة، فالأداء التشغيلي العالي عوض الفرق.
وعشان الصورة تبقى أوضح، في الربع التاني بس من السنة، الإنتاج وصل ل 129 ألف أوقية، مقارنة ب 120 ألف بس في نفس الوقت السنة اللي فاتت، لكن مش ده بس اللي مهن، دع كمان تكلفة الإنتاج كانت حوالى 681 دولار للأوقية، وده رقم ممتاز مع الكفاءة اللي بيشتغلوا بيها.
وطب الأسعار؟
هنا المفاجأة بقى، متوسط سعر بيع الأوقية في الربع التاني من 2025 وصل ل3287 دولار، وده طبعا فرق كبير عن السنة اللي فاتت لما كانت حوالى 2330 دولار، يعني ببساطة الإنتاج زاد والكفاءة عليت والأسعار العالمية كمان ساعدت، وده كله بيترجم لعوائد أعلى ومساهمة أكبر من المنجم في الاقتصاد الوطني.
وفوق كده، في إشارات قوية لاكتشافات دهب جديدة حوالين منطقة المنجم، وده بيخلي منجم السكري مش بس بيدي دهب، لأ ده ممكن يقود طفرة جديدة في مجال التعدين في مصر كلها.
والخلاصة، هي إن منجم السكري بيحقق أرقام ممتازة، والإنتاج في طريقه للزيادة أكتر في النُص التاني من السنة، خاصة لو استمرت جودة الخامات وكفاءة التشغيل، يعني عندك كنز في الصحراء الشرقية ولسه الخير اللي جاي أكتر.
