هل تنتهي أزمة الرسوم الجمركية في أغسطس؟.. شوف وزير الخزانة الأمريكية قالت إيه عن الاتفاق مع الصين
يا ترى هل الأزمة بين أمريكا والصين قربت تخلص، وهل ممكن فعلا نسمع خبر عن اتفاق كبير قريب؟
في أول أغسطس، وزير الخزانة الأميركي سكوت بيسنت، طلع وقال تصريح خلا الناس تفتح عينيها، فقال بالنص: "أنا متفائل.. وبعتقد إننا عندنا كل المقومات علشان نوصل لاتفاق مع الصين يفيد البلدين".
والكلام ده جه بعد مفاوضات استمرت يومين كاملين في العاصمة السويدية "ستوكهولم"، ما بين أكبر اقتصادين في العالم وهما أمريكا والصين، وكمان بيسنت كتب الكلام ده على موقع "إكس" بس بعد كده حذف البوست، وده خلا الناس تتكهن أكتر"ليه حذف التصريح، هل فيه ضغوط ولا المفاوضات لسه فيها شد وجذب؟".
لكن رغم الحذف، هو كان واضح وقال كمان إن الأسبوعين اللي فاتوا شهدوا تقدم كبير في علاقات أمريكا مع الصين واليابان وكوريا الجنوبية، وإن ده جزء من تنفيذ خطة ترامب التجارية اللي اسمها "أمريكا أولًا".
والمعلومة الأهم بقى، ان في مهلة محدداها أمريكا للصين وهتنتهي يوم 12 أغسطس، فالولايات المتحدة كانت رفعت بشكل مؤقت تطبيق الرسوم الجمركية العالية عشان يوصلوا لاتفاق نهائي. ولو الاتفاق تم فعلا يبقى الأزمة دي ممكن تتحل، والتصعيد الجمركي ما بين البلدين يقف، وده يفتح باب جديد للاستقرار في التجارة العالمية.
طب إيه اللي حصل قبل كده؟
في مايو ويونيو، البلدين توصلوا لاتفاقات مبدئية عشان يوقفوا تبادل فرض الرسوم ويقللوا التوتر التجاري، وكمان الصين وافقت وقتها على وقف تصدير بعض المعادن الأرضية النادرة، اللي كانت بتستخدمها كورقة ضغط.
طب هل هتنتهي أزمة الجمارك في أغسطس؟
بص يا سيدي، الاحتمال موجود والتفاؤل واضح من جانب أمريكا ، لكن لسه الكلمة الأخيرة هتيجي مع اقتراب يوم 12 أغسطس، فلو حصل الاتفاق فده هيكون خبر عالمي كبير وهيأثر على أسعار السلع وحركة التجارة وحتى البورصات.
لكن الأهم من كده، هو إن الأزمة دي مش بس بين بلدين كبار، لأ دى مأثرة على سلاسل التوريد العالمية وشركات ضخمة مستنية القرار النهائي علشان تعرف هتستورد منين وتبيع فين، يعني ببساطة، القرار ده ممكن يغير خريطة التجارة في العالم، ويأثر كمان على أسعار الإلكترونيات والسيارات والمعادن وحتى السلع الغذائية.
وفي تقارير كمان، بتقول إن بكين وأمريكا قربوا يتفقوا على إطار زمني جديد لتخفيف الرسوم بشكل تدريجي بدل ما يتشال مرة واحدة، وده ممكن يبقى حل وسط يرضي الطرفين، ويمنع أي تصعيد مفاجئ تاني.
