الدهب يتعافى بعد خسائر يوليو.. شوف الأسعار رايحة على فين؟
يا ترى إيه اللي بيحصل للدهب، كان بينزل طول شهر يوليو وفجأة بيرجع ياخد نفسه، هل بدأ يتعافى، طب الفترة الجاية مخبية ايه للمعدن الأصفر؟
في شهر يوليو اللي فات، الدهب خسر حوالي 100 جنيه في السوق المحلي عندنا في مصر، وه حصل وسط تخبط عالمي وتكهنات عن فوايد ممكن تتخفض من الفيدرالي الأمريكي، لكن في آخر أسبوع من الشهر الأسعار رجعت تطلع تاني، والناس رجعت تشتري.. طب ليه ده حصل؟
بص يا سيدي، ده حصل هشان الدولار نزل والاقتصاد الأمريكي بدأ يتهز، وفعلا شعر جرام 21 بقى ب 4600 جنيه، وجرام 24 وصل ل 5257 جنيه، وجرام 18 ب3943 جنيه، والجنيه الدهب سجل 36800 جنيه، أما الأوقية في البورصة العالمية فزادت 26 دولار في أسبوع واحد وبقت ب3363 دولار، يعني فيه موجة صعود ولازم نعرف ليه.
السبب الرئيسي، هو تصريحات "جيروم باول" رئيس الفيدرالي الأمريكي، واللي قال إنه مفيش قرار واضح بخصوص الفايدة في سبتمبر، والسوق اتوتر والدولار وقع.
كمان، بيانات الوظايف اللي نزلت من أمريكا كانت ضعيفة جدا، 73 ألف وظيفة بس في شهر، وده رقم ضعيف جدا وبيخلي الناس تسيب الدولار وتروح للدهب كملاذ آمن.
والناس فعليا يدأت تشتري دهب، وفي تقرير من مجلس الدهب العالمي بيقول إن الطلب على صناديق الدهب الاستثمارية وصل لأعلى مستوى من 2020، يعني المستثمرين الكبار بيرجعوا يشتروا دهب تاني.
كمان، التحليل بيقول إن احتمال خفض الفايدة في سبتمبر وصل ل 92%، يعني الدهب ممكن يخترق حاجز 3400 دولار للأوقية قريب جدا، وده مش بعيد خاصة مع ضعف البيانات الاقتصادية الأمريكية والتوترات التجارية، وكمان مزادات سندات الخزانة الأسبوع الجاي، فكل ده بيحرك السوق ناحية الدهب والناس بتأمن نفسها.
فوق كل ده، أمريكا فرضت جمارك جديدة على واردات بعض الدول في أول أغسطس، وده بيزود التوتر وبيخلي الدهب يلعب دور البطل المالي البديل.
والخلاصة، هي ان الدهب رجع يتنفس بعد ما خسر كتير في يوليو، والدنيا باين إنها رايحة لموجة صعود. بس خليك فاكر السوق بيتغير بسرعة،ذ ومفيش حاجة ثابتة.
