هل يؤجل صندوق النقد الدولي المراجعتين الخامسة والسادسة لمصر؟
في استعدادات كبيرة جدا بتقوم بيها الحكومة في الوقت الحالي للمراجعة الخامسة والسادسة لصندوق النقد الدولي.. ياتري أمتي هتكون المراجعة دي.. وآية الاستعدادات اللي بتقوم بيها الحكومة للانتهاء منها.
في حالة من التخبط حاليا موجودة بين صندوق النقد الدولي والحكومة المصرية التخبط ده ظهر تحديدا من وقت المراجعة الرابعة للصندوق واللي صرفتها مصر من كام شهر واللي وصلت قيمتها وقتها ل 1.2 مليار دولار واللي استمرت فيها المناقشات لفترات طويلة بين الحكومة وصندوق النقد الدولي خصوصا بعد توجيهات الرئيس للحكومة لمناقشة وفد الصندوق لتأجيل تطبيق بعض شروط رفع الدعم وصرف شرائح القرض بسبب التحديات والتوترات الجيوسياسية والاقتصادية اللي كان بها تأثير سلبي علي الناتج القومي المصري وايرادات مصر الدولارية من الخارج.
المناقشات اللي قامت بيها الحكومة مع وفد صندوق النقد الدولي واللي طالت لأكثر من شهر، واللي وفد الصندوق وقتها تفهم وجه نظر الدولة المصرية وقرر تأجيل تنفيذ بعض الشروط واعتمد صرف شريحة القرض لمصر واللي وصلت ل 1.2 مليار دولار، وفضلت الأمور علي حالها لحد ما جه وقت المراجعة الخامسة للصندوق وفعلا وفد الصندوق جه علي مصر وبدأ يباشر أعماله ويناقش الإجراءات اللي أخذتها الحكومة لرفع الدعم عن السلع والخدمات اللي بتقدمها الحكومة للمواطنين، وكمان خطة الدولة للتخارج من بعض القطاعات والشركات المملوكة للدولة، والأمور كانت ماشية تمام التمام لحد ما وفد الصندوق علق علي تأخر مصر في تنفيذ برنامج الطروحات الحكومية، خصوصا أن الحكومة عندها عدد كبير من الشركات المملوكة لها واللي كان المفروض تكون انتهت من طرحها في البورصة المصرية قدام شركات القطاع الخاص للشراكة فيها، واللي هتشمل عدد من شركات القوات المسلحة زي شركتي صافي ووطنية ده غير بعض الشركات التانية وطرح بعض المطارات.
وفد صندوق النقد الدولي جه مصر وعمل مراجعته علي الاقتصاد القومي المصري،. ورفع تقريره لمسئولي صندوق النقد واللي قرروا تأجيل صرف الشريحة الخامسة من قرض ال 8 مليار دولار واللي هتوصل قيمتها ل 1.3 مليار دولار، بسبب تأخر مصر في الانتهاء من برنامج الطروحات الحكومية خصوصا أن وجود الشركات دي في عدهه الحكومة المصرية هيؤدي إلي وجود أعباء مالية جديدة علي الناتج القومي المصري، قرر وفد الصندوق تأجيل المراجعة الخامسة علشان تكون مع المراجعة السادسة واللي متوقع امها تكون في شهر سبتمبر اللي جاي.
