تحرك جديد في أسعار الذهب.. شوف الأسعار والتوقعات رايحة على فين؟
يا ترى إيه اللي بيحصل في سوق الدهب، وليه الأسعار نازلة طول الأسبوع وفجأة حصل ارتداد مفاجئ، وليه المعدن الأصفر رجع يعلى تاني ب 45 جنيه في الجرام الواحد في كام ساعة بس؟
في تعاملات الساعات الأخيرة وتحديدا أول أيام شهر أغسطس، الدهب فاجئ الناس وارتفع بعد ما كان بينزل طول الأسبوع، يعني مثلا عيار 21 اللي أغلب الناس بتشتريه – بقى ب4545 جنيه للبيع و4570 جنيه للشراء، وكمان عيار 24 الأغلى في السوق سجل هو كمان 5194 جنيه للبيع و5222 جنيه للشراء.
وبردو، عيار 18 بقى حوالى 3895 جنيه، انا عيار 14 سجل 3030 جنيه، وكمان الجنيه الدهب فوصل ل 36,560 جني، يعني في خلال أسبوع الدهب نزل حوالى 100 جنيه، لكن في الساعات الأخيرة طلع تاني 45 جنيه..طيب ليه ده بيحصل؟
بص يا سيدي، اللي حصل ببساطة إن السوق كان بيشهد عمليات بيع كبيرة وناس كتير كانت بتحقق أرباح بعد ما الدهب وصل لمستويات قياسية، فبدأت الأسعار تنزل، لكن بمجرد ما الأسعار نزلت الطلب زاد شوي وده رجع السعر يطلع تاني.
وبحسب تقرير مجلس الدهب العالمي، فالمصريين اشتروا حوالي 11.5 طن دهب في الربع التاني من 2025، وده أقل من نفس الفترة السنة اللي فاتت ب20%، وده عشان الناس بدأت تتراجع شوية عن الشراء لما الأسعار فضلت تعلى بدون توقف، وبدأوا يبيعوا عشان يستفيدوا من المكسب.
والملحوظة المهمة كمان، إن مشتريات المصريين من السبايك والعملات الذهبية تحديدا نزلت بنسبة 23% مقارنة بالسنة اللي فاتت.. طيب التوقعات رايحة على فين؟
التحليلات بتقول إن استمرار استقرار الاقتصاد المصري وسعر الصرف ممكن يخلي الناس تهدى شوية عن شراء الدهب كملاذ آمن، بس لو حصلت أي قفزات عالمية في سعر الأوقية أو توترات اقتصادية، هنشوف الموجة تطلع تاني بسرعة، وحاليا الأوقية العالمية واقفة عند حدود 3348 دولار تقريبا، وده رقم كبير نسبيا.
والخلاصة، هي ان سوق الدهب ماينفعش تتوقعه بسهولة، فلو ناوي تشتري أو تبيع فلارم تكون متابع لحظة بلحظة خاصة إن الأسعار بتتحرك بسرعة والتغيير ممكن يحصل في يوم واحد.
