زيارة مهمة للبنك المركزي.. مفاجأة جديدة في سعر الدولار.. تحرك مهم للسيطرة على السيولة
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، زيارة مهمة للبنك المركزي، ومفاجأة جديدة في سعر الدولار، وتحرك مهم للسيطرة على السيولة.
نبدأ من البنك المركزي المصري..
النهارده حسن عبد الله محافظ البنك المركزي استقبل أولاييمي كاردوسو محافظ البنك المركزي النيجيري والوفد اللي معاه في مقر البنك بالقاهرة.. الزيارة دي جاية في إطار دعم التعاون بين مصر ونيجيريا في مجالات اقتصادية مختلفة.. وده جزء من توجه الدولة لتقوية علاقتها مع الدول الإفريقية في كل القطاعات.
بعد الاجتماع.. حسن عبد الله خد نظيره النيجيري في جولة جوه دار طباعة النقد بالعاصمة الإدارية الجديدة شافوا فيها كل مراحل إنتاج الفلوس.. من أول التصميم لحد ما الورقة النقدية تطلع جاهزة.. واتعرفوا كمان على حجم الإنتاج والتكنولوجيا اللي بيستخدموها في الطباعة.. سواء في تأمين الفلوس ضد التزوير أو في مراحل اختبار الجودة قبل ما الفلوس تنزل السوق.
الزيارة كمان شملت تبادل خبرات بين موظفين البنك المركزي المصري والوفد النيجيري.. والمصريين عرضوا خبراتهم في حاجات زي: التعليمات الرقابية.. بازل.. السياسات النقدية.. إدارة المخاطر.. الرقابة على البنوك.. الشركات الكبيرة.. الخدمات المصرفية.. التكنولوجيا المالية.. الأمن السيبراني.. وتحليل البيانات.. الوفد كمان زار المعهد المصرفي المصري اللي بيعتبر الذراع التدريبي للبنك المركزي واتعرف على دوره في تأهيل الكوادر البنكية بأحدث المعايير الدولية.
نكمّل مع البنك المركزي.. اللي أعلن النهارده إنه سحب سيولة من السوق بـ 154.7 مليار جنيه من خلال عملية عطاء مفتوحة من 16 بنك وده حصل بعد ما قرر يعدّل سياسات قبول العطاءات بالفائدة الجديدة 24.5%.
البنك المركزي كان نزل تعليمات جديدة بتنظم عملية ربط الودائع في السوق المفتوحة.. اللي بيعملها كل أسبوع. وبيحدد فيها حجم العملية وبيتم قبول العطاءات بنظام التخصيص حسب النسبة اللي بيقدمها كل بنك مقارنة بإجمالي العطاءات.
لكن الجديد.. إن البنك قرر يعدّل الطريقة دي ويمشي على نظام تاني بدل ما يخصص نسبة.. بقى يقبل كل العطاءات اللي بتتقدم والنتائج بتتنشر بعد كده على الموقع الرسمي للبنك المركزي.
نروح بقى لسوق العملة..
النهارده.. الدولار الأمريكي واصل التراجع قدام الجنيه المصري لليوم التالت على التوالي وده بحسب البيانات الرسمية من البنوك في مصر,
نبدأ بالبنك الأهلي المصري..
سعر شراء الدولار وصل لـ 48.67 جنيه.. وسعر البيع بقى 48.77 جنيه
وفي بنك قطر الوطني (QNB).. نفس أسعار البنك الأهلي تقريبا.. الشراء 48.66 جنيه والبيع 48.76 جنيه.
أما البنك التجاري الدولي (CIB).. فسعر الشراء 48.65 جنيه والبيع 48.75 جنيه.
وبنك الإسكندرية سجل نفس الأرقام بالضبط ونفس نسبة التراجع.
نختم بتصريحات مهمة جدًا من أحمد زكي.. أمين عام شعبة المصدرين في اتحاد الغرف التجارية، قال إن أوروبا بدأت بالفعل تفتح أسواقها قدام الصادرات المصرية خاصة الزراعية والغذائية والصناعية وده بسبب التحولات السياسية والاقتصادية اللي بتحصل في العالم.. واللي أثرت على التجارة وسلاسل الإمداد.
زكي وضّح إن التوترات الجيوسياسية وتعقيد اللوجستيات خلت أوروبا تعيد حساباتها وتفكر في شركاء بديلين، خصوصًا إن التعامل مع بعض دول شرق آسيا بقى فيه مخاطرة.. بسبب الحروب والصراعات المفاجئة.. ومن هنا جت مصر كاختيار موثوق ومستقر لتغطية احتياجات أوروبا من الغذاء والخامات.
واحد من أبرز دلائل التحوّل ده.. هو صدور قوانين جديدة بتسمح رسميًا بدخول البطاطس المصرية لأسواق أوروبا.. ومش بس كده.. لكن كمان فيه تسهيلات كبيرة في الإجراءات الجمركية والرقابية وده تطور كبير مقارنة باللي كانت بتواجهه المنتجات المصرية زمان من شروط قاسية ومعوقات كانت بتعطّل الصادرات؟
