قبل ما تشتري أو تبيع.. اعرف السر ورا ارتفاع الذهب المفاجئ
يا ترى ليه الدهب طلع تاني وبقى في أعلى مستوى ليه من 5 أسابيع، وإيه علاقة الرئيس الأمريكي دونالد ترامب والاتحاد الأوروبي بالدهب، والأسعار رايحة على فين الأيام الجاية؟
في الساعات الأخيرة، الدهب فجر مفاجأة وارتفع حوالي 1%، وسجل في المعاملات الفورية 3428 دولار للأونصة، وده أعلى رقم من يوم 16 يونيو، أما العقود الآجلة للدهب فزادت كمان بنسبة 1.1% ووصلت ل3443 دولار.
طب ليه الارتفاع ده؟
بص يا سيدي، السبب الأساسي هو إن في حالة ضبابية في الاقتصاد العالمي، يعني في عدم يقين وخوف من اللي ممكن يحصل، خاصة بعد تهديدات ترامب الأخيرة بفرض تعرفات جمركية بداية من أول أغسطس.
كمان، عوائد السندات الأمريكية نزلت لأقل مستوى ليها من أسبوعين، وده بيخلي الدهب شكله أحلى في عين المستثمرين، لأنهم دايما بيدوروا على الملاذ الآمن، والدهب هو الأول في القائمة.
فوق كل ده، جيم ويكوف كبير المحللين في كيتكو، قال إن في طلب واضح على الدهب كملاذ آمن بسبب التوترات في الاتفاقات التجارية بين أمريكا وأوروبا، واللي شكله مفيش فيه أي تقدم، وفي نفس الوقت وزير الخزانة الأمريكي طلع وقال إنه هيقعد مع نظيره الصيني الأسبوع الجاي، وفي احتمال يمدوا مهلة فرض الجمارك لحد 12 أغسطس، وقال كمان إن أمريكا هتعلن عن سلسلة اتفاقيات تجارية مع دول تانية قريب، يعني العالم كله دلوقتي مش فاهم رايح على فين، وده بيخلي الناس تشتري دهب كنوع من الأمان.
كمان، السوق مستني اجتماع الفيدرالي الأمريكي الأسبوع الجاي، والكل بيراقب هيثبتوا الفايدة ولا هيقللوها؟
لو قالوا هيخفضوا الفايدة في أكتوبر، ساعتها ممكن نشوف الدهب بيطير أكتر، وفي المعادن التانية، الفضة طلعت 0.6% وبقت 39.16 دولار، والبلاديوم طلع 1.4% لكن البلاتين نزل شوية.
طب السؤال الأهم. هل دهب لسه هيزيد ولا ممكن يرجع يهدى تاني؟
بص يا سيدي، اللي بيرفع الدهب دلوقتي هو حالة الخوف في السوق من قرارات سياسية واقتصادية مش واضحة، لو استمرت التوترات، وفعلا أمريكا فرضت تعرفات أو الفيدرالي لمح بتخفيض الفايدة، فالأسعار مرشحة للزيادة أكتر، أما لو حصل تفاهمات مفاجئة أو تحسن في العلاقات التجارية، ممكن الأسعار تهدى شوية.
والخلاصة، هي إن الدهب دلوقتي على القمة، ولو ناوي تشتري أو تبيع فالقرار قرارك.
