الدهب رايح على فين؟.. شوف توقعات الأسعار بعد قرار الفيدرالي الأمريكي
يا ترى الدهب رايح على فين، وليه في ناس بتقول هيغلى وناس تقول هينزل، وليه الكل مستنية قرار الفيدرالي الأمريكي في الأيام الجاية من شهر يوليو الحالي، إيه علاقته بأسعار المعدن الأصفر؟
في الساعات الأخيرة، أسعار الدهب في السوق المصري نزلت شوية، يعني حوالي 5 جنيه بس، وعيار 21 سجل 4645 جنيه للجرام، اما بقى عالميا فنزلت الأونصة 5 دولار، ووصلت ل 3350 دولار. يعني باختصار، السوق كله في حالة هدوء كده قبل العاصفة اللي جاية مع قرار الفيدرالي.
والفيدرالي الأمريكي يلمح دلوقتي لتيسير نقدي، والناس مستنيه، هل هيخفض الفايدة في الأيام الجاية ولا إيه بالظبط اللي هيحصل؟
هنا، رد كريس والر، عضو الفيدرالي، وقال إنه مع تخفيض الفايدة بسبب تباطؤ سوق العمل، بس في نفس الوقت بيانات التضخم مش واضحة، وكمان نؤشر أسعار المستهلكين طلع، لكن مؤشر المنتجين فضل ثابت، يعني لسه الصورة مش كاملة.
كمان، مؤشر الدولار نزل شوية لكن على مدار الأسبوع طلع، وده بيأثر على الدهب لأن العلاقة بينهم عكسية، فكل ما الدولار يقوى الدهب بيضعف والعكس صحيح.
وما تنساش بقى المفاجآت السياسية، خاصة وان في شائعات عن إن ترامب ناوي يغير جيروم باول، رئيس البنك الفيدرالي، ورغم إن الكلام ده اتنفى رسميل، بس السوق خايف، لأن ده بيهز ثقة الناس في استقلال البنك المركزي، وبيخلي الناس تشتري دهب كملاذ آمن.
زفي الوقت اللي أمريكا بتلعب بالفايدة، الصين ماشية في سكة تانية خالص، والبنك المركزي الصيني زود احتياطياته من الدهب للشهر التامن على التوالي، وضخ استثمارات في صناديق الدهب ب8.8 مليار دولار في يونيو بس، يعني هم بيستعدوا وده بيزود الطلب على المعدن الأصفر.
طب ايه الوضع عندنا في مصر؟
بص يا سيدي، دلوقتي السوق المصري متأثر بالهدوء العالمي، وسعر الدولار مقابل الجنيه شبه ثابت، وده معناه إن أي تغيير كبير مش هيحصل إلا لو الأونصة أو الدولار اتحركوا جامد.
أما التوقعات بقى، فلو الفيدرالي خفض الفايدة ممكن الدهب يطير لفوق، انا بقى لو الفايدة فضلت ثابتة فالسوق هيكمل تذبذب.
ومحليا عندنا في مصر، كل حاجة مربوطة بسعر الأونصة وسعر الدولار، فأي مفاجأة في الاتنين يعني حركة مفاجئة في السوق المصري.
وفي النهاية نقدر نقولك، لو ناوي تشتري دهب أو تبيعه، تابع الفايدة الأمريكية وسعر الدولار أول بأول، وخليك عارف ان السوق في مرحلة ترقبب ومفيش اتجاه واضح لحد دلوقتي.
