هبوط عنيف في سعر الدولار.. موعد الإعلان عن الأسعار الجديدة للبنزين.. وزيارة خارجية مهمة لمحافظ المركزي
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، هبوط عنيف في سعر الدولار، وموعد الإعلان عن الأسعار الجديدة للبنزين، وزيارة خارجية مهمة لمحافظ المركزي.
والبداية من سوق الصرف...
الدولار نزل قدام الجنيه بأكتر من جنيه وربع في مصر خلال أول نص 2025، وده حسب بيانات رسمية من البنك المركزي.
ووفقًا لبيانات "المركزي"، الدولار نزل في البيع حوالي 1.32 جنيه خلال أول 6 شهور من السنة، وده خلى السعر يهبط من 50.84 جنيه في أول السنة لـ49.51 جنيه في يوليو.
أما سعر الشراء، الدولار خسر برضه 1.32 جنيه خلال نفس الفترة، وبقى 49.38 جنيه في أول يوليو بدل ما كان 50.70 جنيه في أول السنة.
ومن ناحية تانية، احتياطي النقد الأجنبي في البنك المركزي زاد بنهاية يونيو 2025، ووصل لـ48.7 مليار دولار، بعدما كان 47.1 مليار دولار في ديسمبر 2024.
البنك المركزي كمان أعلن إن معدل التضخم الأساسي السنوي نزل لـ11.4% في يونيو 2025، وده بسبب إن المعدل الشهري للتضخم كان بالسالب 0.2% في يونيو، مقارنة بـ1.3% في نفس الشهر السنة اللي فاتت، و1.6% في مايو 2025، ودي تعتبر أول مرة التضخم الشهري يبقى بالسالب من يوليو 2024.
ونروح لخبر البنزين والسولار...
ناس كتير بتسأل عن معاد إعلان أسعار البنزين والسولار الجديدة بعد الزيادة الأخيرة في أبريل اللي فات، واللي كانت أول زيادة في 2025.
لجنة التسعير التلقائي للمواد البترولية المفروض بتجتمع كل 3 شهور عشان تحدد الأسعار بناءً على أوضاع السوق العالمية والمحلية.
لكن الحكومة لما أعلنت الزيادة في أبريل قالت إنها مش هتراجع الأسعار قبل 6 شهور على الأقل، يعني الأسعار الحالية هتفضل زي ما هي لحد الأسبوع الأول من أكتوبر الجاي.
تسعير البنزين والوقود دايمًا موضوع بيشغل الناس، خصوصًا مع التوترات العالمية اللي أثرت على الأسواق المحلية، بجانب التحديات اللي بيواجهها قطاع البترول.
وحتى بعد الزيادة الأخيرة، لسه في فجوة بين تكلفة الإنتاج وسعر البيع، وده لأن الدولة موجهة أغلب الدعم للسولار، البوتاجاز، وبنزين 80 و92.
ونروح لخبر مهم عن مجموعة العشرين...
وفد مصر برئاسة حسن عبدالله، محافظ البنك المركزي، شارك في اجتماع وزراء المالية ومحافظي البنوك المركزية لدول مجموعة العشرين "G20"، اللي استضافته جنوب إفريقيا يومي 17 و18 يوليو 2025، وده كان الاجتماع التالت خلال السنة.
الوفد ضم ياسر صبحي نائب وزير المالية للسياسات المالية، ومنة الله فريد وكيل محافظ البنك المركزي للعلاقات الخارجية، وعلاء عبدالرحمن مستشار وزير المالية للمؤسسات الدولية.
المحافظ شارك في جلسات مهمة عن الاقتصاد العالمي، الهيكل المالي، معوقات التنمية في إفريقيا، التمويل المستدام، والشمول المالي.
وفي الاجتماعات، أكد إن الاقتصاد العالمي لسه تحت ضغط بسبب التوترات الجيوسياسية والحروب التجارية، وإنه لازم يكون فيه تنسيق بين السياسات النقدية والمالية عشان نحافظ على الاستقرار الاقتصادي، وشدد على أهمية السيطرة على توقعات التضخم وتحسين إدارة السيولة، وقال إن قوة الاقتصاد الكلي أساس أي إصلاح ناجح.
ونختم بخبر عن أسعار الأجهزة الكهربائية..
جورج زكريا، رئيس شعبة الأجهزة الكهربائية بالجيزة، أكد إن أسعار الأجهزة الكهربائية مستقرة من السنة اللي فاتت ومفيش زيادات.
وقال إن التكييفات والمراوح كان عليها عروض وخصومات في فبراير اللي فات، لكن العروض خلصت والأسعار رجعت لمستوياتها الطبيعية.
وأوضح إن أسعار التكييفات 1.5 حصان بتبدأ من 18,500 جنيه، وبتوصل لـ32,000 جنيه لو أعلى إمكانيات، أما المراوح 12 بوصة فبتبدأ من 800 جنيه، والأنواع العالية بتوصل 3000 أو 3500 جنيه، وفيه أسعار أرخص بس من غير ضمان ولا ماركة. وتوقع إن الأسعار تفضل ثابتة لحد نهاية الصيف.
