خبر سعيد من صندوق النقد لمصر.. قفزة جديدة للدهب.. حوافز لجذب الاستثمارات التركية
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، خبر سعيد من صندوق النقد لمصر، وقفزة جديدة للدهب، وحوافز لجذب الاستثمارات التركية.
والبداية بخبر مهم جدا المديرة العامة لصندوق النقد الدولي كريستالينا جورجييفا أكدت إن الصندوق ناوي يصرف 2.3 مليار دولار للحكومة المصرية بعد ما أثبتت جديتها في تحقيق أهداف برنامج الإصلاحات الاقتصادية.
وأكدت جورجييفا في لقاء مع قناة سكاي نيوز عربية على هامش القمة العالمية للحكومات 2026 في دبي إن الحكومة المصرية التزمت بجد ببرنامج الإصلاح وإنجاز الإجراءات اللي اتخدتها واللي مكنتش سهلة أبدا ووضحت إن صرف الشريحة الجديدة تأثيره مش بس مادي لكنه بيبعت رسائل إيجابية للأسواق بتعكس التزام مصر بتنفيذ البرنامج وقدرتها على تحقيق تقدم حقيقي في السكة دي وقالت إن الصندوق خلاص قرب يخلص مراجعة المرحلة النهائية للبرنامج.
ومصر دلوقتي مستنية اعتماد المجلس التنفيذي لصندوق النقد للمراجعتين الخامسة والسادسة لبرنامج الإصلاح الاقتصادي وده اللي هيسمح بصرف الشريحتين بتوع القرض ومعاهم أول دفعة من تمويل الاستدامة.
ومن الأخبار العالمية نروح لسوق الصاغة اللي الأسعار فيه قفزت في مصر خلال تعاملات النهاردة الأربعاء 4 فبراير 2026 وده بسبب الارتفاع العالمي للأونصة اللي حصل في ساعات الصبح البدري.
سعر الأوقية عالميا كسر حاجز 5000 دولار للمرة التانية في تاريخه بعد ما كانت زادت الأسبوع اللي فات ووصلت لـ 5560 دولار وبعدين رجعت نزلت في أول الأسبوع ده لأقل من 5000 دولار قبل ما ترفع تاني في تعاملات النهاردة وتوصل لـ 5076 دولار.
وفي السوق المحلي جوه مصر أسعار الذهب ارتفعت النهاردة في الصاغة والأسعار كانت كالتالي سجل سعر جرام الذهب عيار 24 حوالي 7886 جنيه مقارنة بـ 7686 جنيه في بداية التعاملات الصباحية يعني بزيادة 200 جنيه وسجل جرام الذهب عيار 21 حوالي 6900 جنيه مقارنة بـ 6725 جنيه في بداية اليوم بزيادة 175 جنيه أما عيار 18 فسجل حوالي 5915 جنيه مقارنة بـ 5765 جنيه الصبح بزيادة 150 جنيه.
ونروح للمهندس محمد الجوسقي الرئيس التنفيذي للهيئة العامة للاستثمار والمناطق الحرة اللي شارك في فعاليات منتدى الأعمال المصري التركي واللي اتعمل تحت عنوان الفرص الاقتصادية لشراكة استراتيجية بمشاركة كبيرة من المسؤولين وقادة البيزنس في مصر وتركيا وبحضور حوالي 400 شركة مصرية وتركية وده بيعكس قوة العلاقات الاقتصادية بين البلدين.
وأكد رئيس هيئة الاستثمار إن مصر بتوفر بيئة استثمارية مستقرة وقوية وده بفضل الإصلاحات الشاملة والسياسات الواضحة اللي بتهدف لتبسيط الإجراءات وتقليل التكاليف وزيادة الشفافية ده غير تسهيل الدخول للأسواق الأوروبية والأفريقية والشرق أوسطية وده بيخلي مصر قاعدة مثالية للتوسع في الإنتاج في قطاعات الصناعة واللوجستيات والطاقة المتجددة والتحول الرقمي.
وشدد الجوسقي على إن العلاقات المصرية التركية تعتبر عنصر أساسي لدعم استثمارات الشركات التركية في مصر وتعزيز التكامل الصناعي والتقني اللي بيساعد في خلق فرص عمل وتحقيق تنمية للطرفين وأشار إن الهيئة بتقدم حزمة حوافز وإجراءات سريعة زي الرخصة الذهبية وبتحل أي تحديات ممكن تقابل المستثمرين الأتراك.
ونختم بتصريحات وزير المالية أحمد كجوك اللي قال فيها إن مصر شغالة على طرح أول سندات للأفراد خلال النص الأول من 2026 بهدف تنويع أدوات الاستدانة.
وأضاف كجوك خلال فعاليات القمة السنوية التاسعة لأسواق المال النهاردة الثلاثاء إن الطرح هيكون بشروط جيدة تناسب الأفراد وبتحقق سرعة التخارج بما يضمن مكاسب اقتصادية للمستثمرين الأفراد ووضح إن مصر ناوية تطرح إصدارات دين دولية بقيمة 2.5 مليار دولار في النص التاني من العام المالي الحالي وأشار إن الوزارة طرحت إصدارات بملياري دولار في النص الأول عشان تلتزم بالسقف المحدد للإصدارات الدولية في حدود 4.5 مليار دولار.
