الفضة تحقق مكاسب بنسبة 27% منذ بداية 2025.. هل تحل محل الدهب كأداة استثمار؟
يا ترى هل الفضة هتاخد مكان الدهب قريب، وإيه سر القفزات اللي بتحصل في أسعارها، هل هتدوم ولا مجرد قفزة مؤقتة بس؟.
من أول السنة، الفضة عاملة مفاجآت كبيرة في السوق، وبالفعل قفزت بنسبة 27% محليا، وده رقم مش قليل أبدا، كمان السعر العالمي زاد بنسبة 32% للأوقية، وده أعلى مستوى توصلت له الفضة من 13 سنة.
طيب إيه اللي حصل؟
اللي حصل إن الطلب زاد جدا على الفضة، وده بسبب الطلب الاستثماري والصناعي كمان اللي عليها، وده اتسبب قي حدوث قفزة في الأسعار رغم وجود نقص كبير في المعروض.
كمان، السوق بقاله خمس سنين ورا بعض بيعاني من عجز في المعروض، وده بيحصل بسبب مشاكل في الإنتاج في دول زي المكسيك وروسيا، وكمان لإن 70% من الفضة بتطلع من معادن تانية، يعني مش مناجم فضة مباشرة.
طب وإيه اللي خلى الطلب يزيد بالشكل ده؟
حاجتين كبار، أولها هي التوترات التجارية الأخيرة خاصة من أمريكا، واللي زودت الرسوم على معادن كتير، فالمستثمرين جريوا على الفضة كبديل قوي، وتاني حاجة والأهم هي إن الطلب الصناعي خاصة في مجالات الطاقة الخضراء، زي الخلايا الشمسية والتقنيات الكهرومائية والصناعات دي بتاكل فضة زي ما العربيات بتاكل بنزين.
وبالنسبة للي بيسال هل الفضة هتحل محل الدهب، فنقدر نقول إن من ناحية الأداء في 2025، فالمعدن الرمادي كسب السباق، لأن المعدن الأصفر مستقر حوالين 3355 دولار، لكن الفضة بقالها كام أسبوع بتكسر أرقام قياسية واحدة ورا التانية.
كمان، الدهب دايما كان الملاذ الآمن الأول، لكن الفضة دلوقتي بقت ملاذ وكمان معدن صناعي، يعني عندها أكتر من مصدر طلب، وده بيخلي تحركاتها أقوى وأسرع.
والكلام ده معناه إنك لو بتفكر كاستثمار متوسط أو طويل المدى، فالفضة ممكن تكون فرصة حقيقية، خاصة لو كلام بنك سيتي طلع صح، وقالوا إنها ممكن توصل لـ40 أو حتى 46 دولار قبل نهاية 2025، يعني المكاسب لسه جاية، بس خليك دايما فاهم إن المعادن متقلبة، والاستثمار فيهم لازم يبقى بحذر ومعاهم جزء من محفظتك مش الكل.
والخلاصة، هي إن الفضة راجعة وبقوة، مش بس كزينة ولا معدن منافس للدهب، لكن كأصل استثماري وصناعي بيكسب أرض كل يوم، ومع التوترات العالمية، وضعف المعروض، وزيادة الطلب من الطاقة النظيفة، الفضة ممكن تبقى مفاجأة الجزء التاني من 2025، ويمكن، لو استمرت على نفس الطريق فهتتفوق على الدهب نفسه.
