زيادة متوقعة في أسعار السجائر.. هدوء في العملات.. ومصر الأولى إفريقيا في سرعة الإنترنت الثابت
رصدت بانكير، خلال الساعات الأخيرة، عدد من الملفات على الساحة المحلية والعالمية، التي تم نشرها عبر منصاتها المختلفة، والتي يأتي من أبرزها، زيادة متوقعة في أسعار السجائر الشعبية، وهدوء في سوق صرف العملات، ومصر الأولى إفريقيا في سرعة الإنترنت الثابت.
نبدأ بخبر يهم ناس كتير من المصريين.. إبراهيم إمبابي، رئيس شعبة الدخان باتحاد الصناعات، كشف إيه اللي هيحصل في أسعار السجائر الشعبية الفترة الجاية، خصوصًا بعد ما اتزودت أسعار السجاير الأجنبية.
وقال إمبابي في تصريحات صحفية إن الشركة الشرقية للدخان ناوية ترفع أسعار السجاير في السوق، وده هيحصل أول ما يصدر القرار الرسمي بزيادة حدود الأسعار ويتنشر في الجريدة الرسمية ويتطبق، وأكد إن الزيادة قريبة جدًا.
وأضاف كمان إن أسعار السجاير الشعبية ممكن تزيد من 3 لـ4 جنيهات، وده بعد ما الشركات الأجنبية بدأت ترفع أسعارها من أول الشهر، ومعاها كمان بعض أنواع المعسل زادت أسعارها.
نروح لسوق الدولار.. سعر الدولار النهاردة فضل ثابت قدام الجنيه في كل البنوك، وده تزامنًا مع الإجازة الأسبوعية للبنوك، وبعد ما البنك المركزي قرر يثبت سعر الفايدة في الاجتماع اللي حصل يوم الخميس اللي فات.
وبالنسبة للأسعار في شوية بنوك، حسب المواقع الرسمية، كانت كالتالي:
في البنك الأهلي المصري: الدولار بـ 49.46 جنيه للشراء و49.56 جنيه للبيع.
في بنك مصر: 49.45 جنيه للشراء و49.55 جنيه للبيع.
في بنك فيصل الإسلامي: 49.46 جنيه للشراء و49.59 جنيه للبيع.
نروح لخبر تاني مهم.. مصر بقت رقم 1 في أفريقيا في سرعة الإنترنت الأرضي، وطلعت كمان 9 مراكز عالمية من أول السنة، حسب تقرير Speedtest العالمي لشهر مايو 2025.
التقرير وضّح إن أداء الإنترنت الثابت في مصر بيزيد بشكل ملحوظ، ووصلنا للمركز 71 عالميًا، بسرعة إنترنت ثابتة 88.16 ميجا.
ووزارة الاتصالات شغالة على توصيل كابلات الألياف الضوئية لكل قرى "حياة كريمة"، علشان يقدموا أفضل خدمة إنترنت في البيوت، وبيكثفوا الشغل علشان يجهزوا بنية تحتية قوية تناسب أحدث التقنيات والمعدات.
الدكتور عمرو طلعت، وزير الاتصالات، قال إن الإنترنت والتليفونات فضلت شغالة رغم حريق سنترال رمسيس، وده بفضل استراتيجية "ازدواجية الشبكة" اللي الوزارة بتطبقها.
ونختم جولتنا بخبر من سوق الذهب.. أسعار الذهب ثبتت النهاردة السبت 12 يوليو 2025 مع بداية التعاملات، وده آخر تحديث لأسعار الذهب في السوق:
سعر جرام الذهب عيار 24: وصل لـ 5325 جنيه.
وسعر جرام عيار 21: بـ 4660 جنيه.
وسعر جرام عيار 18: بـ 3994 جنيه.
أما الجنيه الذهب فسعره وصل لـ 37280 جنيه.
