مصر هتستخرج الكهرباء من مصدر جديد.. إيه القصة؟
مشروع ضخم جديد مصر بدأت تشتغل عليه، عشان تطلع الكهربا من الميه، وده هيخلينا نستغنى عن الغاز الطبيعي خالص، ده غير أن الكهربا مش هتقطع تاني في الصيف، بس إيه علاقة الصين بالموضوع؟.. وإزاي المشروع هيتنفذ على أرض الواقع؟
زمان كنا بنعتمد على الغاز الطبيعي والسد العالي في توليد الكهرباء، لكن دلوقتي؟، مصر بدأت تفتح على نفسها أبواب جديدة للكهربا، إزاي يعني؟
فيه نظام جديد اسمه الضخ والتخزين، واللي فكرته بسيطة وعبقرية في نفس الوقت، واللي هنبدأ التعاون فيه مع الشركات الصينية العاملة في مجالات الطاقة المتجددة زي ما قال وزير الكهرباء.
مصر بتتحرك في كل الاتجاهات وخاصة في مجالات الطاقة والكهرباء، وده عشان النور ميقطعش عند حد تاني بسبب مشكلة نقص الغاز، والمشروع ده هيكون عن طريق الضخ وتخزين الميه، وهنعمل محطات لتخزين الطاقة وتكوين مزيج للطاقة هيضمن استقرار الشبكة واستمرارية التغذية، وده لأن اعتمادنا هيكون على الطاقات المتجددة خلال المرحلة الجاية.
توليد الكهرباء من الميه، ليه أهمية كبيرة جدا لأن تخزين الطاقة والتوسع فيها بيضمن تأمين الشبكات الكهربائية اللي بتعتمد على الطاقة المتجددة، زي الطاقة الشمسية وطاقة الرياح، وده هيضاعف قدرة مصر التوليدية لوحدة الميه المستخدمة، ده غير أنه هيور البنية التحتية للطاقة والربط الكهربائي العابر للحدود.
طب إيه المكاسب اللي هتاخدها مصر من المشروع ده؟
أول حاجة هيكون عندنا كهرباء نضيفة ومن غير ملوثات، وهنستغل الطاقة الزيادة بدل ما تضيع، ده غير أننا هنوفر الكهربا وقت الذروة، وهيكون دعم قوي لشبكة المهربا بكفاءة أعلى، وبكده، مصر بتدخل نادي الطاقة الذكية وتستغل كل نقطة ميه وطاقة لصالحها.
هل مصر هتقف لحد كده؟
في مصر بتتبني استراتيجية عمل هتشمل عدد من المشروعات المستقبلية للضخ والتخزين، وده تأكيدا على أهميتها كمصدر دائم ومستقر لإمدادات الطاقة المتجددة في ظل الاستراتيجية الوطنية للطاقة والاعتماد على الطاقات المتجددة، وده هيبقى في إطار التحول الطاقي وإعادة تخطيط الشبكة.
وزير الكهرباء كمان كشف عن خطة مصر الجديدة عشان نقدر نكون مستقرين في الكهرباء، واللي منها تحويل الشبكة الكهربائية من شبكة نمطية إلى شبكة ذكية وتنفيذ خطة مستمرة، عشان نقدر نبني ونطور قدرات الشبكة وبنيتها التحتية لاستيعاب القدرات الجديدة والمتجددة اللي هتم إضافتها كل سنة.
الخلاصة.. أن مصر بتشتغل دلوقتي أنها تستغل الموارد الطبيعية المتاحة عشان تحقق أقصى استفادة منها وتستغلها الاستغلال الأمثل، وده هيوفر عليها أنها تستورد الغاز الطبيعي وكمان هتوفر ملايين الدولارات.
