من أول السجاير لحد البترول الخام.. مين اللي هيدفع تمن تعديل القيمة المضافة؟
يا ترى مين اللي هيتأثر فعليا من تعديلات القيمة المضافة الجديدة.. وايه حكاية السلع الأساسية اللي الحكومة بتقول مش هتقرب منها.. وليه اصلا الدولة بتفرض ضريبة قيمة مضافة على السلع والخدمات.
وزارة المالية أعلنت مؤخرًا عن تعديلات محدودة على قانون القيمة المضافة.. وقالت بمنتهى الصراحة إن التعديلات دي مش هتمس السلع والخدمات الأساسية اللي بتأثر على حياة المواطن اليومية.. زي الأكل.. الصحة.. التعليم.
طب التعديلات شكلها إيه.. ومين اللي هيدفع تمنها في الآخر؟
خلينا نفهم الأول ليه الحكومة عملت كده.. المالية بتقول إن التعديلات دي هدفها تحقيق عدالة ضريبية.. وتشجيع النمو الاقتصادي.. وتوسيع القاعدة الضريبية من غير ما تفرض أعباء على المواطن.
يعني ببساطة.. عايزين يدخلوا فلوس أكتر من ناس مش بيدفعوا اللي عليهم.. أو بيستغلوا ثغرات.. من غير ما الناس الغلابة يحسوا بحاجة.
طب نرجع للتعديلات بقى.. إيه اللي اتغير؟
أول حاجة.. قطاع المقاولات.. قبل كده كان خاضع لضريبة جدول بنسبة 5%.. دلوقتي لأ.. هيخضع للسعر العام للضريبة.. وده معناه إنه هيحاسب على القيمة المضافة زي أي نشاط تجاري.. لكن في المقابل.. المقاولين بقى ليهم حق الخصم الكامل لكل الضرائب اللي دفعوها على المدخلات بتاعتهم.. سواء كانت مواد خام أو خدمات.
يعني التعديل هنا هدفه شفاف: إصلاح تشوه ضريبي موجود بقاله سنين.. وفيه ناس كانت بتستفيد منه أكتر من غيرها.
تاني حاجة.. الوحدات التجارية في المولات والمراكز التجارية.. دول هيتحسب عليهم ضريبة بنسبة 1% من القيمة البيعية أو الإيجارية.. يعني لو عندك محل في مول.. الضرائب هتيجي تحاسبك بناء على الإيجار أو سعر البيع.
ده مش معناه إن الحكومة بتزود الضريبة على المواطن العادي.. لكن بتحاول تستفيد أكتر من الأماكن اللي بتكسب كتير.. خصوصًا لو فيها أنشطة مش خاضعة قبل كده.
نيجي للحتة الحساسة بقى.. البترول.. وهنا مش بنتكلم عن المنتجات البترولية.. لأ.. البترول الخام نفسه.. بقى خاضع لضريبة جدول بنسبة 10%.. ودي خطوة ممكن نقول إنها جايه في إطار توسيع القاعدة الضريبية.. بس لحد دلوقتي مفيش أثر مباشر على سعر البنزين اللي بتشتريه من المحطة.
طب والسجائر؟
دي بقى من أكتر الحاجات اللي حصل عليها تعديل واضح.. حصل زيادة 50 قرش على الضريبة القطعية لكل شريحة.. ودي أول زيادة بتحصل من 2023.
يعني باختصار.. العلبة ممكن تزيد نص جنيه.. وده رغم إن الشركات نفسها كانت بتطالب بفتح الشرائح وتعديل الضريبة.. وكمان المشروبات الكحولية بقى ليها نظام ضريبة جديد.. مرتبط بنسبة الكحول مش بس بالسعر.. يعني كل ما النسبة تعلى.. الضريبة تعلى.
وخلينا نرجع للسؤال اللي بدأنا بيه..هل الأسعار هتزيد على المواطن؟
وزارة المالية بتقول لأ.. السلع الأساسية زي الأكل.. العلاج.. التعليم.. مافيهاش أي تغيير.. لكن لو انت شغال في مقاولات.. أو عندك محل في مول.. أو بتستهلك سجاير أو مشروبات كحولية.. التعديلات دي هتفرق معاك.
