هتحقق نهضة قريب.. إزاي الحكومة بتدعم المشروعات المتوسطة والصغيرة؟
يا ترى هي الحكومة إزاي بتدعم المشروعات الصغيرة والمتوسطة، هل بتديها فرصة عشان تكبر وتحقق نهضة اقتصادية، وليه المشروعات ذي مهمة أصلا؟
في الحقيقة، الحكومة مهتمة جدا الفترة دي بقطاع المشروعات الصغيرة والمتوسطة، لأنه واحد من أهم القطاعات اللي بتشغل ناس وبتوفر فرص عمل بالملايين.
ولو ماتعرفش، فالمشروعات الصغيرة والمتوسطة دي بتمثل حوالي 90% من المشروعات على مستوى العالم، وبتشارك بنص الاقتصاد، وكمان بتوفر حوالي 70% من فرص العمل، وده طبعا بيخلي الحكومة ادعم المشروعات دي بكل الطرق الممكنة.
عشان كده، باسل رحمي، الرئيس التنفيذي لجهاز تنمية المشروعات، بيقول إن الحكومة المصرية بتثدم حوافز جامدة للمشروعات دي، زي تسهيلات تمويلية من البنوك، وخفض للضرائب ورسوم التسجيل، ودي حاجات بتشجع أي حد عاوز يشتغل ويكبر مشروعه.
والموضوع مش واقف بس التمويل، لأ ده كمان في دعم تسويقي، والحكومة مخصصة 40% من مشترياتها الحكومية للمشروعات دي، يعني مضمونة تبيع جزء من إنتاجها للجهات الحكومية من غير ما تقلق، وطبعا كل ده غير التعاون مع وزارة المالية ومصلحة الضرايب عشان يشجعوا الناس توفق أوضاعها وتدخل تحت مظلة الاقتصاد الرسمي ويستفادوا من الإعفاءات والحوافز.
وبالمناسبة، الجهاز شغال على استراتيجية وطنية عشان يدعم المشروعات الصغيرة والمتوسطة، سواء من خلال المنصات الرقمية اللي فيها كل بدائل التمويل من بنوك ومؤسسات مختلفة، أو من خلال التدريبات والتأهيل الفني والإداري، وكمان مبادرات لتمكين المرأة وصغار المستثمرين من كل المحافظات خاصة في الأماكن النائية.
فوق كل ده، الجهاز دلزقتي بيشتغل على توطين الصناعة، وده يعني تقليل الاستيراد وزيادة التصنيع المحلي، وده هدف كبير جدا للدولة حاليا، وكمان بيشجعوا رأس المال المخاطر بالتعاون مع البنك الدولي، ودي حاجات هتخلي فرص النجاح أكبر وتفتح باب التصدير قدام الشباب وأصحاب المشاريع.
وفي النهاية، نقدر نقولك إن الحكومة شايفة المشروعات الصغيرة والمتوسطة كنز كبير، وبتدعمها من كل النواحي، عشان كده الفرصة دايما موجودة، والمستثمرين الشباب لازم يستغلوها، فلو عايز تبدأ وتنفذ مشورع صغير على قدك ماتترددش.
