تراجع كبير.. شوف اللي بيحصل للدولار ويا ترى إيه السبب؟
يا ترى إيه اللي بيحصل لسعر الدولار الأيام دي، وليه بدأ يتراجع شوية قصاد الجنيه بعد ما كان واخد اتجاه صعودي لفترة طويلة، وهل ده بداية اتجاه جديد ولا مجرد استراحة مؤقتة؟
النهاردة الدولار نزل شوية قدام الجنيه المصري، بعد ما كان قرب يوصل 51 جنيه في كل البنوك، ومن هنا قال البنك المركزي إن الورقة الخضرا سجلت حوالي 50.62 جنيه للشراء و50.75 للبيع، يعني أقل من إمبارح بشوية حلوين.
وفي نفس الوقت، معظم البنوك الكبيرة زي الأهلي ومصر وبنك القاهرة وسي أي بي، ثبتت السعر عند 50.63 جنيه للشراء و50.73 جنيه للبيع، وده بيدل عبى إن السوق فيه استقرار نسبي الأيام دي.
طب ليه الدولار بيتراجع؟
بص يا سيدي، أول حاجة هي إن في شوية أسباب إيجابية بتدعم الجنيه، زي إن احتياطي النقد الأجنبي ارتفع لمستوى تاريخي ووصل لاكتر من 48 مليار دولار، وده بيدي ثقة كبيرة للمستثمرين إن الاقتصاد المصري ماشي على الطريق الصح.
عندك كمان، تحويلات المصريين بالخارج اللي زادت أوي، ووصلت ل 29.4 مليار دولار من يوليو لأبريل بس، وده دخل سيولة دولارية كبيرة للسوق، وفوق ده كله، فيه تقارير بتقول إن الاقتصاد الكلي بيتحسن، وده بيطمن المستثمرين والأجانب، فبيشجعوا على الاستثمار في الجنيه المصري بدل ما يدوروا على الدولار.
طيب نشتري دولار دلوقتي ولا نستنى شوية؟
الخبرا بيقولوا، إن سعر الدولار بيتأثر بالعرض والطلب، وبما إن المعروض من الدولار زاد شوية الأيام دي بسبب التدفقات من الخارج، فالطبيعي إنه يريح شوية، بس لو كنت محتاج دولار لسفر أو شغل، فالفرصة مناسبة، أما بقى لو بتفكر تستثمر على المدى الطويل، فخليك دايما متابع السوق وشوف المؤشرات الاقتصادية، لإن زي ما بنقول دايمل مفيش حد يعرف الدولار هيروح فين 100%.
بردو، لازم نعرف إن قوة الجنيه مش هتيجي من قرارات مؤقتة بس، لكنها محتاجة استقرار اقتصادي دايم، وزيادة الإنتاج والتصدير وجذب الاستثمارات، ولو المشوار ده استمر، يبقى الجنيه هيبقى أقوى على مدار السنين الجاية، وهنشوف سعر الدولار أهدى من اللي بنشوفه الأيام دي.
كمان لازم ناخد بالنا من نقطة مهمة أوي، وهي إن الدولار دايما بيتأثر بالأحداث العالمية زي أسعار الفائدة الأمريكية وأخبار الفيدرالي الأمريكي، وأي خبر كبير على المستوى الدولي ممكن يقلب الموازين، فحتى لو شايفين استقرار مؤقت، فدابما يبقى في عامل المفاجأة، خاصة وإن الأسواق المالية مالهاش كبير زي ما بنقول.
وفوق ده كله، في توقعات إن الحكومة المصرية هتاخد شوية خطوات جديدة لدعم الجنيه وجذب الاستثمارات الفترة الجاية، زي إطلاق مبادرات لدعم الصناعة وزيادة الصادرات، وده ممكن يدينا قوة أكتر للجنيه مقابل الدولار.
