خطة مدبولي.. إيه اللي بيحصل في القطاع الصحي
ليه الحكومة بتسرع عملية الاستثمار في القطاع الصحي.. وإيه هي تفاصيل الخطة اللي أعلن عنها مدبولي.. وإزاي المستشفيات في مصر هتكون أحسن من اللي في أوروبا..
القطاع الصحي في أي دولة من أهم القطاعات الاقتصادية رغم إنه خدمي لكن في نفس الوقت هو قطاع بيعتمد على صناعات استراتيجية مختلفة زي الصيدلة وصناعة الادولية والأجهزوة الطبية ومستلزمات المستشفيات والرعاية والأغذية كمان والاستثمار كمان وفيه مليارات الدولارات بتضخ عالميا في كاستثمارات في القطاعات الصحة المختلفة.. كمان تطور المنظومة الصحية من عوامل.
مصر في الفترة الأخيرة مهتمة جدا بالقطاع الصحي لأنه صناعة كبيرة ومتشعبة بجانب إنه قطاع خدمي استراتيجي .. والدكتور مصطفى مدبولي، رئيس مجلس الوزراء عقد أكتر من اجتماع لمناقشة الخطة الاستثمارية لقطاع الصحة خلال ال10 سنين الجاية بحضور الجهات والمسئولن اللي ليهم صلة بالملف زي الدكتور خالد عبد الغفار، نائب رئيس الوزراء للتنمية البشرية وزير الصحة والسكان والمهندس حسن الخطيب، وزير الاستثمار والتجارة الخارجية..
وأكد مدبولى إن القطاعات الصحية في مصر بعد الفترة دي هتكون شكل تاني خالص وإن الدولة عندها رؤية جادة شغالة عليها للنهوض بالمنظومة الصحية الشامل ولأول مرة الدولة هتدخل القطاع الخاص بكل تقله والمستثمرين كمان عشان يشاركوا في التطوير والتحديث للمنظومة الصحية كلها والتعامل معاها على إنها قطاع استثماري ناجح وفي نفس الوقت يقدم خدمة صحية.
مدبولي أكد كمان إن القطاع الصحي في صدارة القطاعات الواعدة، خاصة السياحة العلاجية والصناعات الطبية والدوائية وتجهيز المستشفيات.. وإن فيه خطة بتتنفذ دلوقتي لتطوير البنية التحتية الصحية زي إنشاء منشآت جديدة وتحديث المراكز الطبية الحالية ..
ودا بخلاف استكمال تنفيذ مراحل التأمين الصحي الشامل لتحسين الرعاية الصحية وتعزيز جاهزية القطاع الصحي لمواكبة المتطلبات المستقبلية.. وكمان قال إنه هيتم فتح فرص استثمارية مع القطاع الخاص وتطبيق معايير الجودة العالمية وإن الاستثمارات هتركز على المنشآت الطبية والخدمات الطبية المتخصصة والتكنولوجيا الطبية والتشخيصية والرعاية الصحية الرقمية والتحول الذكي وتوطين صناعة الدواء وخدمات صحية جديدة زي الرعاية الصحية المنزلية..
الدكتور خالد عبد الغفار من ناحيته كشف إن فيه مشروع لإنشاء شركة لإدارة وتشغيل منشآت رعاية صحية تحت اسم "صحة مصر" وقال إن النظام دا معمول بيه في الخارج وإن فيه شركات خدمات صحية مملوكة للدول هدفها تحقيق ضبط الخدمات الصحية المقدمة في القطاع الخاص ودا هيكون عن طريق إنشاء منشآت صحية تعمل بأسعار ملائمة للمواطنين وبآليات تشغيل زي الموجودة في القطاع الخاص وهتقدم خدمات بنفس مستوى خدمات القطاع الخاص..
يعني من الاخر هنشوف قطاع صحي جديد في مصر ومش هتلف على المستشفيات ولا هتوه في زحمة الأطباء لأن هتكون فيه منظومة صحية رقمية وحديثة وفي كل الاماكن على مستوى الجمهورية مرتبطة رقميا.
