كواليس صفقة المليار دولار بين مصر والكويت.. ضربة قوية للعملة الصعبة
يا ترى إيه حكاية الصكوك بقيمة مليار دولار اللي مصر هتصدرها للكويت.. و إيه الصكوك دي أصلا؟ وليه الكويت بالذات؟ وهل ليها علاقة بالودايع الكويتية اللي عندنا؟ وهل ده معناه إننا هنودع الديون خلاص؟
خلينا نبدأ من الأول.. إيه هي الصكوك دي؟ ببساطة كده، الصكوك هي أداة تمويل إسلامية.
يعني إيه؟
يعني بتتوافق مع أحكام الشريعة الإسلامية.. على عكس السندات التقليدية اللي ممكن تكون مبنية على دين بس.. الصكوك لازم تكون مرتبطة بأصول حقيقية.
يعني لو مصر هتصدر صكوك، لازم يكون فيه أصل حقيقي ليها وده اللي حصل بالظبط الجريدة الرسمية نشرت قرار من رئيس الجمهورية بتخصيص أرض كبيرة جداً في محافظة البحر الأحمر، مساحتها حوالي 174.4 مليون متر مربع، لصالح وزارة المالية. ليه؟ علشان تستخدمها في "خفض الدين العام للدولة وإصدار الصكوك السيادية".. يعني الأرض دي هي اللي هتبقى الأصل اللي بتستند عليه الصكوك دي.
طيب، ليه الطرح ده خاص بدولة الكويت؟ الموضوع ببساطة إن ده جزء من اتفاق بين مصر والكويت، بالتحديد مع بيت التمويل الكويتي. وده بيجي في إطار جهود الحكومة المصرية عشان تنوع مصادر تمويلها وتستفيد من أدوات التمويل الإسلامي. الطرح ده مخصص بالكامل كإصدار خاص لصالح الكويت، ومش مطروح للاكتتاب العام في الأسواق الدولية.
وايه علاقة ده بالودايع الكويتية اللي عندنا؟
فيه علاقة كبيرة طبعا.. مصر عندها ودائع كويتية في البنك المركزي بحوالي أربعة مليار دولار وأول شريحة منهم وهي ملياري دولار.. هتستحق في سبتمبر اللي جاي والشريحة التانية في أبريل 2026.. فإصدار الصكوك ده ممكن يكون جزء من ترتيبات لتسوية أو إعادة هيكلة بعض الودائع دي.. أو على الأقل بيقلل الضغط على الحكومة المصرية في سدادها في توقيتات معينة.. بمعنى تاني الكويت ممكن تستثمر جزء من ودائعها دي في الصكوك المصرية الجديدة.
والصكوك دي هتكون لأجل 3 سنين، وهيكون العائد بتاعها نصف سنوي. مصر خلصت معظم الترتيبات الفنية والإجرائية الخاصة بالطرح الخاص ده، وده معناه إنها خطوة جادة ومدروسة.
طيب إيه أهمية الخطوة دي لمصر؟
اول حاجة .. تنويع مصادر التمويل.. وده بيخلي مصر متعتمدش على نوع واحد من التمويل، وبيفتح ليها أسواق جديدة زي أسواق التمويل الإسلامي.
كمان خفض الدين العام.. زي ما قلنا، تخصيص الأرض دي بيساعد في خفض الدين العام للدولة، وده مؤشر كويس على تحسن إدارة الدين.
بالاضاف. للثقة الدولية.. إصدار الصكوك، خصوصاً لو نجح، بيبعت رسالة ثقة للمستثمرين الدوليين في الاقتصاد المصري. مصر كانت أصدرت أول صكوك سيادية في تاريخها سنة 2023 بقيمة 1.5 مليار دولار، وجذبت طلبات بقيمة 6.1 مليار دولار، وده كان نجاح كبير جدا.
الاكيد ان إصدار الصكوك بقيمة مليار دولار للكويت مش مجرد عملية مالية عادية. دي خطوة استراتيجية مهمة جداً للاقتصاد المصري. بتورّي إن مصر بتحاول بكل الطرق تنوع مصادر تمويلها، وبتدير ديونها بذكاء، وبتحاول تستفيد من علاقاتها القوية مع الدول الشقيقة زي الكويت.
