ضربة قبل العيد للدولار.. ايه اللي حصل في تحويلات المصريين
عارفين كلنا أن أي زيادة في معروض الدولار بالبنوك يتقوي ضهر الجنيه وتضعف العملة الأمريكية وبالتالي سعرها بينزل وسعر الجنيه بيرفع ودا بردوا معناه استقرار مالي اكبر وسيطرة على التضخم والاسعار في كل الاسواق.
طيب ايه مناسبة الكلام عن الدولار دلوقتي ؟
شوف حضرتك البنك المركزي المصري أعلن النهاردة خبر سار جدا وهو تحقيق تحويلات المصريين العاملين قفزة جديدة وغير مسبوقة.. وأعلن المركزي إن التحويلات قفزت خلال الفترة من يوليو 2024 ح مارس 2025، إلى 26.4 مليار دولار، مقارنة بـ 14.4 مليار دولار خلال نفس الفترة من العام المالي السابق، بزيادة نسبتها 82.7% على أساس سنوي..
الزيادة التاريخية طبعا مش مجرد ارقام... إطلاقا دا مؤشر قوي وواضح على تعافي الثقة في الاقتصاد المصري وتحسن أداء سوق الصرف بخلاف استقرار السياسات النقدية والمالية ودا اللي شجع المصريين بالخارج على توجيه المزيد من أموالهم إلى الداخل عبر القنوات الرسمية وبعيداً عن السوق السودا وكل دا بيصب في صالح شرايين الاقتصاد المصري.. وطبعا زيادة المعروض من الدولار في السوق المصرفي.. باختصار دي ضربة قوية جدا للدولار وفي وقت مهم اووي لأن الدولار لو متابعين داخل على شهرين دلوقتي وهو بيهبط في البنوك وكل يوم بينزل على اللي قبله.
طيب هل فيه أسباب تانية لارتفاع تحويلات المصريين ؟..
فيه أكتر من سبب خلي التحويلات تقفز أولها استقرار سعر الصرف بعد تطبيق السياسات الإصلاحية الأخيرة ومنها التعويم واللي شجعت التحويلات عبر القنوات الرسمية بدل من السوق الموازية... وكمان تحسن الثقة في الاقتصاد المصري خاصة بعد زيادة الاحتياطي النقدي وتدفقات الاستثمار الأجنبي... وفيه كمان الحوافز الحكومية اللي تم الإعلان عنها لجذب تحويلات المغتربين زي الإعفاءات الجمركية على سيارات المصريين بالخارج وربط التحويلات ببرامج استثمارية مجزية... ودا غير ارتفاع معدلات التوظيف للمصريين بالخارج في أسواق الخليج وأوروبا.
طيب ايه أهمية التحويلات دي؟
حضرتك تحويلات المصريين بالخارج دي بتعتبر أحد أكبر مصادر النقد الأجنبي لمصر وبتتفوق في بعض السنين على إيرادات قناة السويس والسياحة والاستثمار الأجنبي المباشر. . وكمان بتلعب دور مهم في دعم ميزان المدفوعات وتعزيز احتياطي النقد الأجنبي وتوفير العملة الصعبة لتلبية احتياجات الاستيراد وخدمة الدين الخارجي..
