تعرف على شروط وإجراءات اصدار أكثر من بطاقة لنفس حساب التوفير بالبنوك
التعاملات البنكية واحدة من الحاجات اللي بتهم عدد كبير من المواطنين لكن عمرك سألت نفسك هل البنك ممكن يصدر أكثر من بطاقة لنفس حساب التوفير.. لو ده حصل اية الخطوات المطلوبة.
وفي الوقت الحالي الدولة بكل قطاعاتها بتتجه للشموال المالي والرقمي والحكومة حاليا بتقدم كل وسائل الدعم المطلوبة للمواطنين للدخول في المنظومة الجديدة للتحول الرقمي، والبنوك اتاحت لكل المواطنين امكانية فتح حسابات في البنوك المصرية كواحدة من الخطوات المهمة لإدارة الأموال بشكل آمن ومنظم، سواء للأفراد أو المؤسسات، ده غير أنها اتاحت للعملاء إمكانية إصدار بطاقة خصم مباشر لإجراء السحب والشراء، مع إمكانية إصدار بطاقة إضافية في بعض الحالات.
طيب اية هيا خطوات فتح حساب توفير في البنوك المصرية؟.
في الوقت الحالي عملية فتح حساب في البنوك الوطنية واحدة من الخطوات البسيطة واللي بتوفرها كل البنوك المصرية للعملاء، ودي بتكون عن طريق أن العميل يتوجه لاقرب بنك له هو عايز يفتح فيه حساب سواء كان بنك حكومي أو خاص ويقدم المستندات المطلوبة واللي بتكون غالبا عبارة عن بطاقة الرقم القومي ولازم تكون سارية بالنسبة للمصريين، وجواز سفر أو إقامة سارية بالنسبة للأجانب، ويكون معاه إثبات محل إقامة حديث سواء كان فاتورة مرافق أو عقد إيجار، وفي بعض الحالات، الموظف ممكن يطلب إثبات مصدر دخل أو وظيفة، والعميل بيحدد نوع الحساب اللي هو عايزه وده بيكون واحد من الحسابات اللي بتوفرها البنوك للعملاء ..
والعميل بيختار حساب التوفير، واخيرا موظف البنك هيطلب منك تعمل ايداع بالحد الأدني المطلوب لفتح الحساب، وده بيختلف من بنك للتاني وغالبا بيكون في رينج ما بين 500 جنيه و1000 جنيه مصري، وبيوقع علي عقد فتح الحساب واقرار بشروط وأحكام التعامل المصرفي، وبيستلم بطاقة الخصم.
وبعد ما العميل يخلص الإجراءات دي كلها البنك بيصدر له بطاقة خصم مباشر ، ودي بتستخدم في السحب النقدي أو الشراء من من المولات أو من خلال الإنترنت.
طيب ازاي العميل يقدر يحصل علي أكثر من بطاقة على حساب التوفير؟.
بعد فتح حساب التوفير والحصول على بطاقة الخصم، يحق للعميل في بعض البنوك التقدم بطلب لإصدار بطاقة إضافية مرتبطة بنفس الحساب، وبقدم طلب رسمي في الفرع باسم صاحب الحساب، بيوضح فيه رغبته في إصدار بطاقة تابعة، وبيرفق صورة بطاقة الرقم القومي الخاصة بالشخص المفوض باستخدام البطاقة الإضافية، وبوقع إقرار قانوني لتحمل المسؤولية الكاملة عن المعاملات اللي بتم باستخدام البطاقة الإضافية، وبيدفع رسوم الإصدار واللي بتختلف من بنك للتاني.
