مكاسب بالجملة.. إزاي خفض أسعار الفايدة هيساهم في تنشيط السياحة وتعزيز ريادة الأعمال؟
بعد ما البنك المركزي خفض أسعار الفايدة للمرة التانية على التوالي، الناس بتسأل يعني إيه، وإزاي ده هيأثر على الاستثمار، على التصدير، وعلى الاقتصاد، ويا ترى هل في خفض تالت جاي قي السكة؟
البنك المركزي المصري قرر يوم الخميس اللي فات، إنه يخفض سعر الفايدة 1% تاني، وبقت 24% للإيداع و25% للإقراض، وطبعا القرار ده بيأكد إن التضخم بقى تحت سيطرة نسبية.، وإن فيه نية حقيقية لتحريك السوق.
ونقدر نقول إن المخفض ده طمن القطاع الخاص، وبيدي إشارة إن فيه استقرار اقتصادي، طب ده معناه إيه؟
بص يا سيدي، ده معناه إن المستثمرين بقوا شايفين إن فيه أمل، يعني تكاليف التمويل قلت، القروض بقت أرخص، والمشروعات بقت أقرب، لأن لما الفايدة بتقل، الاقتراض بيبقى أرخص، فالشركات بتبدأ توسع شغلها، وكمان بيبقي في خطوط إنتاج جديدة وتوسعات ومصانع تشتغل وفرص عمل تتخلق.
وكمان الصادرات بتزيد، لأن المنتج المصري بقى أرخص وأكتر تنافسية في السوق العالمي، كمان القطاع الصناعي وريادة الأعمال هتزيد بشكل كبير، فمثلا في مصانع هتوسع وتزود إنتاج.
أما تأثير ده على العقارات مثلا، فهيبقي قي تمويل أرخص وده معناه إن في مشاريع جديدة هتفتح وتشتغل، كمان الفنادق والسياحة واللي هو قطاع محتاج دعم وتسهيلات، فهيقدر المستثمرين في القطاع ده يلاقوا البيئة أسهل.
كمان، الدولة بتدفع فوائد أقل على ديونها، والعبء بيقل، وممكن نوفر حوالي 80 مليار جنيه لو الفايدة نزلت 1% بس.
طب هل ممكن البنك المركزي ممكن يخفض الفائدة تاني؟
الاحتمال وارد جدا، وده في حالة لو التضخم فضل في اتجاه النزول، وفيه استقرار في السوق، يبثر البنك المركزي ممكن يكمل في طريق التيسير النقدي، ويخفض الفايدة تالت.
بس في شرط مهم، وهو إن لازم الجنيه يفضل قوي، ومايحصلش ضغط على سعره، عشان مايحصلش انفلات في الأسعار أو هروب استثمارات.
عندك كمان، الفايدة لما تقل الناس بتدور على ملاذ آمن فيروحوا يشتروا دهب وسعره بيعلى، أما الدولار فمكن خفضه يضغط على الجنيه، بس لو فيه احتياطي قوي وإجراءات داعمة، ممكن نحافظ على استقراره.
ونقدر نقول إن الدولة عايزة تشغل العجلة، تدي دفعة للقطاع الخاص وتفتح الباب للاستثمار والتصدير، وكل ده بيرجع بالنفع على المواطن، من حيث فرص شغل، أسعار أهدى، واقتصاد فيه نفس.
والخلاصة إن خفض الفايدة للمرة التانية من البنك المركزي مش مجرد رقم، ده قرار ممكن يغير شكل السوق كله، لو إنت مستثمر، صنايعي، بتفكر تفتح مشروع، فالوقت ده ممكن يكون بداية جديدة، فخليك مركز، لأن اللي جاي ممكن يكون أقوى.
