رؤية جديدة من الحكومة لتعزيز تنافسية الصناعة المصرية.. شوف بتعمل إيه؟
يا ترى هي الحكومة بتعمل إيه دلوقتي علشان تخلي الصناعة المصرية تقف على رجليها من تاني، هل الحكومة فعلاً ماشية في خطة واضحة علشان تخلي الصناعة الوطنية تنافس بقوة، وإيه المشروعات اللي اتنفذت على الأرض، وهل ده ممكن يخلى مصر من الدول الصناعية المؤثرة في المنطقة؟..
من كام سنة، الدولة المصرية بدأت رحلة إصلاح اقتصادي شاملة، وكان ملف الصناعة واحد من أهم الملفات اللي اتحطت على الترابيزة، وده لأن الصناعة هي العمود الفقري لأي اقتصاد عايز ينهض.
أول حاجة عملتها الحكومة، إنها أطلقت الاستراتيجية الوطنية لتنمية الصناعة، واللي هدفها الأساسي رفع القدرة الإنتاجية، وزيادة القيمة المضافة، وفتح أسواق جديدة للصادرات المصرية.
طب اتنفذ إيه بقى؟
أول مشروع كبير وملموس هو إنشاء وتطوير المجمعات الصناعية الجاهزة في كل محافظات مصر، فالحكومة أنشأت أكتر من 17 مجمع صناعي متكامل، بمساحات مختلفة، في الصعيد والدلتا والقاهرة، بمرافق كاملة، عشان تساعد المستثمرين، خاصة الشباب، عشان يفتحوا مصانع بسرعة ومن غير تعقيدات.
كمان، الحكومة وسعت في طرح أراضي صناعية بنظام التمليك أو الإيجار التمويلي، بأسعار مدعمة، علشان تخفف العبء على المستثمر الصناعي وتخليه يركز على الإنتاج، ومش بس كده، الدولة أنشأت كمان هيئة تنمية الصادرات، وبدأت فعلياً في تنفيذ برنامج رد الأعباء التصديرية، يعني بترد للمصدرين جزء من التكلفة اللي دفعوها، علشان تساعدهم يفتحوا أسواق خارجية ويصدروا أكتر.
وبرضو، تم تطوير البنية التحتية الصناعية، زي المواني والطرق، والربط اللوجستي بين المناطق الصناعية والمنافذ التصديرية، علشان المنتج المصري يوصل للسوق العالمي بكفاءة وسرعة.
فوق كل ده، الحكومة أطلقت كمان مبادرة دعم الصناعات الصغيرة والمتوسطة، ووفرت تمويلات بفوايد منخفضة، وفتحت قنوات تعاون بين المصانع الصغيرة والكبيرة، عشان كل سلسلة الإنتاج تكمل بعض.
طيب، كل ده ليه؟
الهدف مش بس إنشاء مصانع، لا، الهدف أكبر من كده، زب طيادة الصادرات، وده لأن الحكومة عايزة توصل بالصادرات الصناعية لـ100 مليار دولار في أقرب وقت، وده هيدخل عملة صعبة، ويقلل عجز الميزان التجاري.
كمان توفير فرص عمل حقيقية، فكل مصنع جديد بيشغل مئات أو آلاف العمال، وده بيساهم في تقليل البطالة وتحسين مستوى الدخل.
في هدف تاني زي تحقيق نمو مستدام، وده لأن النمو الصناعي بيخلق بيئة اقتصادية مستقرة، وبيجذب استثمارات أجنبية، وبيحسن تصنيف مصر الاقتصادي عالمياً.
طب ده هيخلّي مصر دولة صناعية مؤثرة؟
الإجابة: آه وبكل ثقة، وده لأن الحكومة مش بس بتطور الصناعة التقليدية، لكنها كمان بتركز على الصناعات التكنولوجية والحديثة، فابتدينا نشوف مصانع بتشتغل بالذكاء الاصطناعي، وأنظمة رقمية ذكية، وتحول رقمي في الإنتاج والإدارة.
وفيه توجه قوي دلوقتي لزيادة التصنيع المحلي بدل الاعتماد على الاستيراد، خصوصاا في القطاعات الاستراتيجية زي الأدوية والآلات والمعدات وحتى السيارات الكهربائية.
وفيه خطوة مهمة كمان، وهي تعزيز الشراكة بين القطاعين العام والخاص، وده باين في إنشاء مجلس تحديث الصناعة اللي بيمثل فيه القطاع الخاص بقوة، وده بيعكس إرادة سياسية واضحة في إشراك رجال الأعمال في رسم السياسات الصناعية.
يعني نقدر نقول، إن مصر بتبني قطاع صناعي حقيقي، مش وهمي بيخلق شغل وبيصدر وبيواكب التطور العالمي، واللي بيتعمل النهاردة، هو حجر الأساس لاقتصاد مصري قوي، مستقر ومؤثر في المنطقة، وده اللي هيدفعنا ناخد مكاننا الطبيعي وسط الكبار.
عشان كده نقدر نقول وبكل ثقو، ده وقت الصناعة المصرية، وده وقت الشغل الحقيقي.
