1.3 مليار دولار.. تمويل جديد من صندوق النقد لمصر لهذه الأسباب
يا ترى إيه هو "تمويل المرونة والاستدامة" اللي بيفكر صندوق النقد الدولي يقدمه لمصر قريب، هل هو ضمن "قرض ال 8 مليار" ولا منحة خاصة؟ ، طب هل في شروط من الصندوق لصرف التمويل ده ولا مافيش المرة دي، ومصر بتعمل إيه دلوقتي عشان تستقيل الفلوس دي؟
في الساعات الأخيرة، الدكتورة رانيا المشاط، وزيرة التخطيط والتنمية الاقتصادية والتعاون الدولي، اجتمعت مع بعثة صندوق النقد الدولي، برئاسة إيفانا فلادكوفا هولار، وده كان بهدف بحث تدابير الإصلاحات اللي هنعملها عشان نقدر نحصل على "تمويل المرونة والاستدامة" بقيمة 1.3 مليار دولار.
وحاليا، مصر بتسعى للحصول على تمويل الصلابة والمرونة من صندوق النقد الدولي، في إطار تنفيذ الاستراتيجية الوطنية للتغيرات المناخية 2050، عشان كده الحكومة بتنفذ عدد من الإصلاحات في مجالات تسريع عملية خفض الكربون في مصر، وتحليل المخاطر المالية المتعلقة بالمناخ، وتعزيز إدارة البيانات والمخاطر المتعلقة بالمناخ، وبناء القدرة على التكيف.
كمان، الإصلاحات دي بتشمل تعزيز قدرة القطاع المالي على المرونة في مواجهة التغيرات المناخية ودعم التمويل المناخي، وتحديد وقياس والإفصاح عن آثار خطط الاستثمار والبرامج والمشاريع على الأهداف الوطنية لتغير المناخ.
ونقدر نقول إن الإصلاحات، واللي بتشمل 3 إجراءات بتتعلق بالمعايير والإجراءات المتعلقة بالمناخ في مرحلة اختيار المشروعات المدرجة ضمن خطة التنمية الاقتصادية والاجتماعية، وكمان بتستهدف توسيع نطاق المشروعات ضمن المنصة الوطنية للمشروعات الخضراء برنامج "نُوفي"، كل ده بجانب توسيع نطاق مشروع تسجيل الأصول التجريبي وإجراء تحليلات للمخاطر المناخية المرتبطة بالموقع الجغرافي للأصول دي.
ومن هنا، أكدت الدكتورة رانيا المشاط، أن منصة "نُوفي" هي من ضمن الإجراءات اللي بتنفذها الدولة في إطار تمويل الصلابة والمرونة، ولها دور كبير في الإشراف على المنصة وتنفيذها، وبالفعل اتخذت خطوات سريعة واستباقية لإضافة مشروعات جديدة، يعني مثلا في مارس اللي فات، تم توقيع مشروع إنشاء محطة تحلية مياه البحر بالعين السخنة ضمن محور المياه، وكمان مشروع تطوير محطة الزعفرانة ضمن محور الطاقة اللي بتنفذه شركتي طاقة عربية وفولتاليا.
كمان، تم توقيع اتفاقية بين وزارة التخطيط والتنمية الاقتصادية والتعاون الدولي، وشركة سكاتك النرويجية، عشان يتعاونوا لضم مشروعات شركة سكاتك النرويجية في مجال الطاقة المتجددة ضمن محور الطاقة بالبرنامج، كل ده بجانب توقيع شركة سكانك النرويجية، مع شركة مصر للألومنيوم، اتفاقية شراء الطاقة بين شركة مصر للألومنيوم، وشركة سكاتك النرويجية لإنشاء محطة للطاقة الشمسية بقدرة 1 جيجاوات لتوفير الطاقة النظيفة لمجمع الألومنيوم بنجع حمادي.
عندك كمان، محور الطاقة نجح في جذب تمويلات ميسرة للقطاع الخاص خلال سنتين بس بقيمة 3.9 مليار دولار لتنفيذ مشروعات طاقة متجددة بقدرة 4.2 جيجاوات، في الوقت اللي بتسعى فيه الحكومة للوصول بالتمويلات ل 10 مليار دولار لتنفيذ قدرات طاقة متجددة ب 10 جيجاوات، عشان تدعم قدرات مصر في مجال الطاقة المتجددة.
والكلام ده معناه إن مصر بتطبق شروط الصندوق بحذافيرها عشان تقدر تحصل على التمويل وفي أسرع وقت ممكن، عشان نسمع قريب جدا تعليق إيجابي من رئيسة بعثة الصندوق اللي هتعلن تاريخ صرف المنحة، وتأكد كمان التزام مصر ببرنامج الإصلاحات وكمان بأوضاع المناخي اللي بقت دلوقتي حديث العالم.
وقريب جدا، هيتم ضخ 1.3 مليار دولار في شرايين الاقتصاد المصري، عشان يعمل انتعاشة قوية للأسواق، وكمان هينعكس على حياة المواطن البسيط بشكل إيجابي، فأبسط حاجة هيلاقيها هي توافر السلع قي الأسواق بأسعار عادلة وكمان انخفاض الأسعار بشكل تدريجي.
