العملاق ايفرجرين يعود لقناة السويس.. بداية عودة المليارات
ايه التطور السار اللي حصل في قناة السويس في الساعات الأخيرة.. وازاي هيكون بداية لعودة المليارات الضائعة للخزينة المصرية وايه تأثير دا على سعر الدولار.
كلنا عارفين إن قناة السويس بتنزف مليارات الدولارات خسائر كل شهر وخسرت اكتر من 7 مليار دولار في الشهور الأخيرة نتيجة استهداف الحوثيين للسفن في الممر الملاحي بجنوب البحر الاحمر المؤدي إلى قناة السويس ودا بعد تعديل شركات الشحن البحري العالمية لسفنها بعيدا عن القناة المصرية والمرور طريق رأس الرجاء الصالح الطويل والمكلف لشركات الشحن.
وعلى مدار الفترة الأخيرة كانت مصر بتبذل جهود كبيرة لوقف التصعيد العسكري في المنطقة لاستئناف الملاحة الكاملة في قناة السويس واخيرا نجح إتفاق أمريكي حوثي في وقف الهجمات على السفن وفي نفس الساعة بدأت هيئة قناة السويس في التواصل مع شركات الملاحة الدولية للعودة للقناة وبدأ الفريق اسامة ربيع رئيس الهيئة في التواصل المباشر مع رؤساء شركات الشحن العالمية لمناقشة خطوات عودة سفنها بالتدريج لقناة السويس.
الجهود المصرية نجحت اخيرا في إقناع واحدة من أهم شركات الملاحة في العالم للعودة لقناه السويس وهي شركة ايفرجرين عملاق النقل البحري التايواني واللي كشفت مصادر أن الخط هيستأنف العبور بقناة السويس مرة تانية الشهر الجاي وكمان البدء في إبرام تعاقدات جديدة واتفاقيات مع الشركات الملاحية والمستوردين.
المصادر أكدت إن أن قرار هيئة قناة السويس بمنح حوافز جديدة للشركات وتخفيض الرسوم في حالات معينة كان ليه عامل إيجابي في إقناع الشركات بالعودة للقناة المصرية خاصة إن التخفيضات حصلت بالتزامن مع الاستقرار النسبي في منطقة البحر الأحمر بعد الاتفاق الذي تم خلال الأيام الماضية بين الجانبين الأمريكي والحوثيين، مع مؤشرات على قرب توقف الحرب في غزة ولان اي تخفيضات في الرسوم معناها مكاسب إضافية لشركات الشحن البحري الكبرى..
مفيش شك إن عودة ايفرجرين لقناة السويس هيكون حافظ لعمالقة النقل البحري التانية للعودة لقناه السويس ومتوقع أن ميرسك ترجع هي كمان قريب جدا مع حالة الاستقرار ومع عودة ايفرجرين ودا بسبب التنافس بين شركات الشحن البحري العالمية لأن استمرار ميرسك وهي من أكبر شركات الشحن في العالم في العبور من رأس الرجاء الصالح هيضيع منها العملاء اللي عاوزين بضاعتهم توصل في اسرع وقت من الشرق للغرب وبأقل تكلفة طبعا ودا مش هيتحقق غير لو مرت من قناه السويس.
مش بس كده دا كمان القناة داخلة على مرحلة جديدة من التطور وتبنى استراتيجية طموحة لتطوير وتحديث منظومة الخدمات البحرية واللوجستية المقدمة لعملائها للانفتاح على عقد شراكات مع الشركات العالمية الكبرى في المجالات البحرية المختلفة.
