بعد قفزة التحويلات.. مصر تقترب من حلم الـ300 مليار دولار
بعد القفزة الكبيرة في تحويلات المصريين في الخارج.. ياترى التحويلات دي هتوصل كام بعد 5 سنين .. وايه حكاية الـ 300 مليار دولار.. وايه فايدة التحويلات دي للدولة المصرية وليه زيادتها ضربة جديدة للدولار.
مصر بتحاول بكل الطرق تحل مشاكلها الاقتصادية المتوارثة من عشرات السنين وأهم أزمة فيهم هي نقص الدولار الدائم وعشان كان دائما بيصعب توفره أطلقوا عليه العملة الصعبة.. لكن الحقيقة في السنين الأخيرة بدأت الدولة تحل الأزمة من جذورها وتتخلي عن سياسة المسكنات وانصاف الحلول.. وبدأت تشتغل صح انها تصنع الدولار بمعني توفره بشكل كبير على مدار السنة من خلال تعظيم موارد الدولار من قطاعات حقيقية زي الصناعات والتصدير والسياحة وقناة السويس والاستثمار.. يعني ببساطة الدولة قررت توطن وتطور القطاعات اللي بتجيب عملة صعبة.
طيب ايه خطط الدولة عشان توفر الدولار وتحقق منه فائض كمان ؟
شوف ياسيدي الحكومة أعلنت من فترة عن رؤية مصر 2030 ودي رؤية بتهدف لتحقيق أهداف اقتصادية محددة في زمن معين ومن بين الخطط دي الحكومة بتستهدف جمع 300 مليار دولار لغاية 2030 ضمن برنامج قومي لحشد الموارد من النقد الأجنبي لتعزيز صلابة ومرونة الاقتصاد في مواجهة الأزمات... الرقم 300 دا مش صعب تحقيقه بالعكس لو الدولة مشيت على نفس الخط اللي هي عليه دلوقتي هتحقق اكتر من. 300 مليار دولار بكتير .. وكلنا شفنا القفزات الكبيرة في موارد مصر الدولارية زي السياحة والتصدير والاستثمار..
أما تحويلات المصريين بالخارج فدي لوحدها قصة تانية ودا بعد الأرقام القياسية اللي أعلن عنها البنك المركزي المصري النهاردة واللي قال فيها إن التحويلات اقتربت من 33 مليار دولار في الفترة من مارس 2024 إلى فبراير 2025 وتحويلات المصريين بالخارج واحد من أكبر مصادر دخل مصر الدولاري وبتساهم في استقرار سوق الصرف وتلبية الاحتياجات التانية للدولة..
الحكومة سبق وأعلنت أنها بتستهدف ضمن رؤية 2030 تنمية تحويلات المصريين بالخارج بنسبة 10% سنويا لتصل إلى 53 مليار دولار بعد أقل من 5 سنين من دلوقتي وممكن الأرقام تزيد عن كده كمان ونوصل الي 60 مليار دولار.. وفيه ميزة في دولار المصريين بالخارج أنه مش بيكلف الدولة حاجة بالعكس بيجي من بره والبنوك بتحوله لجنيهات وتحتفظ بالعملة الصعبة وعشان نبقي عارفين رقم 33 مليار دولار دا مش قليل ودا رقم ضخم وبيوازي 4 أضعاف قرض صندوق النقد الدولي.
طيب الحكومة بتعمل ايه عشان تزود حصيلة التحويلات دي؟
الحقيقة الدولة قدمت حوافز كتير للدولة المصرية أولها مبادرات السيارات والأراضي المميزة وكمان تسهيل الإجراءات البنكية في عمليات التحويل لتقليل الوقت والجهد.. ومتوقع الحكومة تقدم حزمة حوافز جديدة للمصريين بالخارج عشان تحمسهم اكتر عشان يحولوا فلوس اكتر.. ولازم تعمل دا بسرعة جدا.
