إيميل واحد ممكن يشقلب حياتك.. حاجات لازم تعملها عشان تحمي شركتك من “مافيا النصب” الدولية
تخيل كده قعدت عمرك كله تبني في شركتك ومشروعاتك ولما بقت حقيقة وبقي عندك مشروع اقتصادي تتسرق منك وتخسرها ويضيع شقى عمرك بسبب رسالة من ايميل مجهول.. في التقرير ده هنقولك ازاي شركتك ممكن تضيع منك وازاي تحميها وايه حكاية مافيا الاحتيال الدولية.
الاحتيال الإلكتروني في التجارة الدولية انتشر بشكل رهيب قي الفترة الأخيرة ودا بسبب التقدم التكنولوجي السريع في تطبيقات تكنولوجيا المعلومات والاتصالات والذكاء الاصطناعي واللي اتطورت قصادها وبالتوازي عمليات النصب الالكتروني والاحتيال المالي وبقت خطر كبير جدا بيهدد اقتصاديات دول وثروات الأفراد لدرجة أن حصيلة الاحتيال المالي بقت بتوازي حجم تالت اقتصاد في العالم بـ6.5 تريليون دولار سنويا..
لو انت رجل أعمال فيه معلومة تهمك. جزء كبير من عمليات الاحتيال والنصب الاليكتروني بتتوجه للشركات وبستولي على مدخراتها وحساباتها البنكية.. تعالي نقولك دا بيحصل إزاي..
النصابين الالكترونيين ودي بقت مافيا وعصابات مدربة جدآ ومحترفة في تطبيقات التكنولوجيا الرقمية الحديثة وعندها أساليب كتير ومتنوعة عشان تسرق فلوسك وفلوس شركتك منها اختراق البريد الإلكتروني للوصول إلى مراسلات تجارية بين الموردين والمستوردين وانتحال هوية المورد من خلال عناوين بريدية مزيفة تشبه الحقيقية مع تغييرات طفيفة.. وكمان العصابات دي دلوقتي بتقدر توصل لبياناتك وتوجه تحويلات مالية إلى حسابات بنكية وهمية بمستندات مزورة منقدرش تميزها عن المستندات الشرعية.
يعني باختصار كده الهاكر أو المحتال اللي بيقدر يخترق ايميلك والاستيلاء على بياناتك بتكون قدامه كل الداتا بتاعة الشركة وبيقدر يخترق المنظومة المالية ويقدر يحول اي مبالغ من أرصدة الشركة الي حسابات وهمية لكن في النهاية بتكون حسابات المافيا دي وفجأة تلاقي فلوسك وتعب السنين متحولة لحسابات انت متعرفش عنها حاجة والغريبة أنك هتكتشف إن التحويلات دي تمت بطريقة تبدو وكأنها شرعية لأن اللص الالكتروني هنا بياخد مكانك وبيرسل ايميلات للبنوك واوردرات للتحكم في نشاط الشركة..
طيب ازاي تحمي شركتك من السرقة والاحتيال الالكتروني ؟
زي ما بيقول المثل الوقاية خير من العلاج.. أول حاجة تعلمها انك توثق أي تغيير في الحسابات البنكية عبر اتصال مباشر مع الجهات المالية وتاني حاجة ودي يفهما بتوع الأمن المعلوماتي هي تفعيل نظام المصادقة الثنائية لجميع حسابات البريد والأنظمة المالية ودي طريقة لتحصين الحسابات والمراسلات الاليكترونيه.. كمان لازم تدرب الموظفين اللي عندك في الشركة على اكتشاف العلامات التحذيرية زي طلبات التحويل المفاجئة مثلا.. وفيه حاجة تانية مهمة وهي ضرورة استخدام برامج أمنية متطورة ومراجعة أنظمة الحماية بشكل دوري.
وفي حاجة اخيرة لازم تعرفها كصاحب شركة أو مشروع أن عملية استرداد الفلوس اللي اتحولت لحسابات وهمية بتكون صعبة جدا لأن فلوسك بتتحرك في شبكة حسابات معقدة ببيخلي تتبعها عملية شبه مستحيلة.
