الدولار يواصل السقوط أمام الجنيه.. التفاصيل مفاجأة
إيه اللي بيحصل للدولار وليه سعره لسه بتراجع من أعلي قمة وصلها.. وهل الايام الجاية هنشوف تراجع جديد للعملة الأمريكية ولا هنشوف مفاجآت..
النهاردة اول ايام عمل البنوك بعد إجازة 3 ايام متواصلة ومع بداية التداولات استمر سعر الدولار في الهبوط وانخفض اكتر من 10 قروش في التعاملات مقارنة بختام تعاملات الاربعاء اللي فات..
وسجل الدولار النهاردة متوسط 50.76 جنيه مقارنة ب52 جنيه من وقت مش بعيد .. وبعدها الدولار دخل في سلسلة من التراجع ودا لأسباب كتير.. تعالوا نعرفها مع بعض..
أول سبب لتراجع سعر الدولار هو توافر معروض كبير من العملة الأمريكية والنقد الأجنبي ودا اقوى سبب لتراجع الاسعار في سوق الصرف حسب قانون العرض والطلب ومصر استقبلت موارد دولارية ضخمة في الفترة الأخيرة من قطاعات كتير أولها الاستثمار وصفقات المشروعات الكبرى في الأسواق المصرية وشفنا الأرقام الرسمية اللي أعلنت عنها الحكومة والشركاء الأجانب بخصوص المشروعات الجديدة في مصر وخاصة في قطاع الطاقة النظيفة والصناعة والخدمات.
تاني سبب لتراجع الدولار هو الأزمات الكبيرة والوقت الصعب اللي بتمر بيها بالفعل العملة الأمريكية عالميا وسط العملات التانية نتيجة فقد الثقة في الدولار بعد قرارات الإدارة الأمريكية واللي خدت قرارات عقابية كتيرة ضد دول العالم ودا خلي فيه خوف من العالم في الاعتماد على الدولار الأمريكي واتجه لعملات تانية أو الدهب وكله قرر يبعد عن الدولار..
من الاسباب التانية لانخفاض سعر الدولار في مصر الايام دي هو تحسن كل المؤشرات الاقتصادية بشكل ملحوظ وزيادة التدفقات النقدية من اكتر من قطاع زي السياحة وتحويلات المصريين بالخارج والاستثمار زي ما قلنا وكمان من التصدير وقناة السويس وكل القطاعات دي بدأت تتتعافي بشكل كبير جدا ولسه صندوق النقد الدولي متوقع قفزة مثلا في الصادرات المصرية من 40 مليار دولار في 2024 الى64 مليار دولار في السنة الحالية 2025 وهتوصل ل74 مليار دولار في 2026..
التقارير الدولية الموثوق فيها كانت سبب أساسي في تراجع سعر الدولار قدام الجنيه واللي اتوقعت ارتفاع معدلات النمو الاقتصادي بجانب الزيادات النوعية المتوقعة في الأنشطة الاقتصادية خاصة في الصناعة واللي حققت ارقام ضخمة في الكم والكيف حسب تصريحات وزير الصناعة كامل الوزير وكمان النهضة الكبيرة بالقطاع الزراعي واستعداد مصر لافتتاح مشروعات زراعيه قومية ضخمة زي الدلتا الجديدة وشرق العوينات وغيرها وكلها بمجرد ما تدخل الإنتاج هتحقق وفرة للاستهلاك والتصدير.
قطاع التجارة والموانئ واللوجستيات واحد من القطاعات الاستراتيجية في مصر اللي بتقود حركة الاقتصاد المصري وحققت نتائج عظيمة وقدرت تحرك عجلة الاستثمار والتجارة وتوطين الصناعة والمشروعات وجذب اشهر الشركات العالمية للسوق المصري وشفنا السباق الصيني التركي على السوق المصري عشان يكون رأس حربة في صناعاتهم الضخمة اللي نقلوها لمصر...
باختصار تحسن أي نشاط اقتصادي في مصر واي مشروع جديد بيتم افتتاحه واي خط انتاج بيدخل مرحلة التشغيل هو ضربة للدولار ومصدر قوة الجنيه لانه يعني استيراد قليل وتصدير كثير وتوافر الدولار في السوق وانخفاض سعره.
