ضربة قاضية للدولار.. بريكس تتحرك ضد ترامب
إزاي مجموعة بريكس بتخطط لضرب الدولار والرد على غرور ترامب.. وايه الإجراءات اللي ممكن تاخدها في الوقت الحالي.. وايه موقف مصر من تحركات بريكس الأخيرة..
دلوقتي لو متابعين هتعرفوا إن فيه حرب تجارية بين أقوى اقتصاديين في العالم وهما الصين والولايات المتحدة واللي اشتعلت بعد قرارات ترامب الأخيرة بفرض رسوم ضخمة على دخول المنتجات الصينية للسوق الأمريكي واللي ردت عليها الصين بإجراءات قاسية وفي نفس الوقت فيه عقوبات أمريكية اقتصادية ومالية على روسيا بسبب أزمة اوكرانيا ودا بخلاف إن ترامب فرض رسوم على كل دول العالم بما فيهم دول بريكس واللي بتضم حوالي نص سكان الكوكب ودول البريكس بتساهم بحوالي 38% من الناتج المحلي الإجمالي العالمي وبتضم اقوى اقتصاديات العالم زي الصين والهند والبرازيل وبجانب دول تانية واعدة إقتصاديا زي مصر والإمارات والسعودية والأرجنتين وجنوب أفريقيا.
بريكس قررت تتحرك وترد على غرور ترامب وعقدت اجتماع عاجل لوزراء خارجية مجموعة بريكس للدول النامية من ساعات لمناقشة تبني وسيلة مشتركة للدفاع عن النظام التجاري العالمي وتنسيق ردهم على وابل الرسوم الجمركية الجديدة اللي فرضها الرئيس الأميركي دونالد ترامب.. وطبعا المجموعة أدانت السياسات الأمريكية العقابية ضد دول بريكس.
ورغم أن المجموعة اجألت قرار اصدار عملة موحدة بديلا للدولار بعد تهديد ترامب بفرض رسوم 100% على دول بريكس لو استغنت عن العملة الأمريكية لكن فيه اتجاه حالي ورغبة قوية في تقليل الاعتماد على الدولار في المعاملات المالية والتجارية والخدمية بين دول البريكس للضغط على ترامب وإضعاف الدولار عالميا خاصه إن العملة الأمريكية بتمر باسوأ أيامها في الفترة الحالية مع التراجع الكبير أمام العملات الأجنبية الرئيسية وبريكس شايفة أن دا الوقت المناسب لضرب الدولار.
طبعا اي ضعف للدولار بيصب في مصلحة الجنيه المصري لأن تقليل الاعتماد عليه هيزيد المعروض منه في السوق المصرفي وهيخفض سعره والتبادل بالعملات الوطنية مع دول بريكس ودا هيفرق جدا مع مصر لان حجم التعاملات بين مصر وبريكس بتوصل حوالي 30 مليار دولار ودا ممكن يكون ضربة قاضية للدولار في مصر.. واي خفض لسعر الدولار في مصر معناه انخفاض كبير في السلع المستوردة من الخارج وقطع الغيار والمواد الخام المستوردة والمستخدمة في التصنيع.
تقليل الاعتماد على الدولار في معاملات البريكس مش نهاية المطاف لكن في إجراءات تانية ممكن تلجأ ليها دول المجموعة زي إعادة توجيه الاستثمارات الضخمة في دول بريكس للدول الأعضاء بدل من الأسواق التانية وخاصة السوق الأمريكية ودا ممكن يعمل إعادة رسم خريطة الاقتصاد العالمي كله لصالح بريكس بخلاف زيادة التعاون في مجالات كتير جدا بين الدول الأعضاء.
